TURA: South Garo Hills a·jani Siju songo, Rashtriya Madhyamik Shiksha Abhiyan (RMSA) skul nokko rika matchotgija galchipe donengani a·sel jolni chatro chatrirangna noksan ong·na nangenga ine Garo Students Union (GSU) Siju regional unit parakatenba, ia skul nokko matchotate on·china Tura-ni MP Saleng A Sangma-na sedoataha.
GSU Siju regional unit-ni parakatani gitade, ia RMSA skul nokko rikna gita Human Resource Development Ministry 2012-2013 bilsini gisepon sanction ka·ahachim indiba ia skul nokko matchotgija galchipe donahani a·sel ian maming kamrangnan cholijaengahachim.
“RMSA-ni ning·o ia model skulko Siju-o rikahani gimin songni chatro chatrirangna aro gimiknan ka·donganiko ra·baani gita ong·ahachim indiba ia skul nokko matchotgija galchipanichi chatro chatrirangna aro songni nokni manderangna dal·bee gimaani ong·aha,” ine GSU Siju regional unit parakataha.
Ia skul nokko galchipe donengani a·sel chatro chatrirangna gimaani aro ia jolrango namroro silroroaniko champengani gita ong·enga ineba GSU Siju unit-ni dilgiparang parakataha.
Ia skul nokko galchipe donenganichi ian skul nokko ong·gija kamrangna jakkalsretani cholrang donga aro ian wilwilao donggipa manderangna kenchakna nangani ong·enga ineba GSU Siju regional unit parakataha.
“Ia sal somoirango a·song gimikon aro sorkariniba lekka poranian mongsongbatgipa daito ong·engani gimin ia skul nokko matchotatna gita ta·raken tangka paisarangko chamatna nanga,” ineba GSU Siju unit-ni dilgiparang, Tura MP-na sedoatgipa chittio janapataha.
Ia skulko matchote kulie on·na man·genchimode ian chatro chatrirangnasan ong·aigija jolo songdongenggipa manderangna kamrangko nakatate on·naba chol ong·genchim ineba GSU Siju regional unit parakataha.
