Williamnagar: Social activist Nilbath Ch Marak-ni file ka·gipa RTI-na aganchakna chu·sokjani gimin DMHO-ni PIO- Easth Garo Hills, Meghalaya Chief Information Commissioner-ni ge·etanio treasury challan-na gong 3000 tangkako gamna gita nangaha.
RTI Act-ni gita, RTI ka·anina aganchakanio ru·uta ba aganchakna chu·sokja ong·ode department tangka gamna gita nanga. Bang·bata case-rangon department jokrangachim indiba EGH-ni PIO-DMHO-ko MICIC watjaha, tangka gamataha.
Koborni gita meja bilsi 2024 December 4 tariko tangka gamaha. Ua somoio koborko man·jahachim indiba treasury challan-ni photo ba noksako nike sakkiko man·skaha.
“RTI-na aganchakaniko man·ja ba aganchakna ru·utanio maming dingtangani dongjawa ine bang·an chanchitokachim. Indiba iako nike sorkario kam ka·giparangna mikrakani ong·a. Jemanga tangka cha·boka ba uandakgiparangko dakgrikna miksonga, uamangna RTI namen gamchatgipa ostro gita ong·a, ine Nilbath aganaha.
Fine ba dai gamako ‘0070- other administrative serivces etc; 60 other services, 118 receipt under RTI, 2005 Vol 1 under (02) fess and fines for the penalty amount imposed by the Commission’-ni gita ra·chakaha jekon December 5 tariko gamaha
