SHILLONG: Re·baenggipa February 21 tariko ong·atenggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-na Bharatiya Janata Party (BJP)-ni ming 10 ku·rachakanirangko segimin lekkako Sombar salo oprake on·angaha.
Ia manifesto-ko oprakani ja·man kobor ra·timgiparangna talataniko on·angengon, KHADC aro JHADC election-ko seokako man·genchimode, skanggipao jatni dilgiparang, jekai Syiem, Doloi, Sardar aro Rangbah Shnong-rangna bilko on·enba, biming segate hajira ka·enggiparangna, taxi driver-rangna, segri me·chikrangna aro uandake cholgri manderangna japrako gong 2000/- ka·e dakchakanirangko on·na miksongenga ine BJP-ni state president Rikman G Momin parakataha.
Niam gri koela bikotaniko champengani a·sel kajinarangko man·jae a·dokni damgittam district council-rangna on·enggipa kajinarang komiangaha ine janapatengon, ia district council-rangko tangka paisani gita mangrakatpilna Supreme Court-ni ge·etanio pangchake jadokni gisepon scientific mining ba niamo pangchake koela bikotaniko a·bachengatna jotton ka·gen ine Momin parakataha.
A·dokni daka rikanirango pangchake jatni wata chenga, sika koa aro uandakgipa kamrangko tang·doatna aro AYUSH Ministry-ni dakchakanichi, jatni sanna banani bewalrangko bilakbatatna kam ka·gen ineba BJP-ni state president parakataha.
Songadam nokadamrango, Syiem, Doloi, Sardar aro Rangbah Shnong-rang baksa nangrime, skia man·e kamgri ong·e dongenggipa chadamberangna bading chiwalani cholrangko on·na kam ka·gen ineba Momin aganaha.
Jadokni gisepon district council-o membor-rangko bariatna gita ma·mong sorkari baksa agangrikgen ineba ua ku·rachakaniko on·angaha.
KHADC aro JHADC election-o badita seat-rangko chena ka·dongenga ine sing·anina aganchakaniko on·angskaengon, badita seat-rangko chegen ukode uamang aganna man·kujaenga indiba KHADC election-na sak 14 aro JHADC election-na sak 5 candidate-rangko uamang susaatenga aro ia pilak candidate-rangan chegipa ong·na uamang ka·dongenga ine BJP-ni state president aganaha.
NPP-chi dilenggipa MDA sorkario BJP, bakrimangkugen ineba Momin parakataha.
