TURA: Robibar salo, a·songni chang 76-gipa Republic Day-ko Tura-o manianiona district official-rang, songni Nokmarangko aro District Council-ni membor (MDC)-rangko okamja ine Tura-ni MDC Bernard N Marak, West Garo Hills a·jani Deputy Commissioner-na badi ka·e sedoataha.
Marak-ni Deputy Commissioner-na badi ka·e sedoatgipa chittio parakatani gitade, A·chik a·songo Nokmarangan jatko dilgiparang ong·a aro MDC-rangba a·brini a·doko Hill Areas ba a·bri jolrangko nirok sandigipa ong·e, iandakgipa a·songni manianirango mande ra·e okamako man·na nangachim indiba bilsiantian gita ia changoba district official-rang, Nokmarangko aro MDC-rangko ia manianiona okamtaijaha.
“Na·a saksa ia a·jani dilgipa ong·e, manderangni niam bidik aro jatni daka rikaniko ma·sigipa ong·na nangachim indiba ia changoba Tura-o Republic Day-ko manianiona Nokmarangko aro MDC-rangko okamtaijaha,” ine Tura MDC, Deputy Commissioner-na sedoatgipa chittio, an·tangni suk ong·gijaniko parakataha.
“Iani bidingo anga ru·uta bilsirangnan jrip dongaiaha indiba bilsiantian na·simangni officer-rang, apsan dakgualaniko dakengani gimin ia changde anga iani bidingo nang·na u·iatna miksongaha,” ineba Marak parakataha.
Bilsiantian Republic Day, Independence Day, Meghalaya Day, Labour Corps Day aro uandakgipa salrangko manironga ine janapatengon, iandakgipa manianirangona changsaba officer-rang, a·king Nokmarangko aro MDC-rangko okamronga ine Tura MDC, an·tangni suk ong·gijaniko parakataha.
Mikkangchi iandakgipa dakgualanirangko dakjachinaba Marak, West Garo Hills a·jani Deputy Commissioner-ko didiataha.
