SHILLONG: Sorkarini oe donenggipa ‘do·gako chipna’ skangan Hynniewtrep National Liberation Council (HNLC) bobil dolko agangrikaniona re·bapilchina sorkari okamataha.
HNLC bobil dolko a·dok aro ma·mong sorkari dolgnian agangrikaniona re·bachina okamenga ine janapatengon, “Iani bidingo name chanchipiltaichina anga uamangko (HNLC) didienga. Da·o dipet sorkarini do·gako uamangna oe donengkuanmi gimin uamang tom·tomaniona re·bapilna gita agangrikna re·baon nambatgen. Salsaode uamangna oe donenggipa do·gako chipnaba dongaha,” ine a·dokni Deputy Chief Minister aro Home Minister Prestone Tynsong aganaha.
HNLC bobil dolni dilgiparang, a·dok aro ma·mong sorkari baksa agangrikaniko a·bachengatahaoba, uamangni case-rangko kema ka·na sikjaenga ine matnangenba, re·anggipa bilsini January jaon agangrikaniko ra·pilangahachim.
Bame on·gipa HNLC-ni manderangko sorkari, bobil dolni kosako sandina jakkalenga ine matnanganiko jegalatengon, “Sorkario chu·onga gita sipairang donga aro ia sipairangko, a·doko songdongenggipa mande sakantini naljokgnina namen train ka·aha,” ine Tynsong parakataha.
A·songni niam bidiko pangchake HNLC bobil dol baksa agangrikna nangenganiko adita salrangna skangsan, a·dokni Chief Minister Conrad K Sangma-ba janapatenba, a·dokni tom·tomanina aro namroro silroroanina HNLC bobil dol baksa agangrikaniko chu·sokgipa ong·atna sorkarini nangnikenganiko parakatahachim.
“Chinga HNLC bobil dol baksa agangrikaniko a·bachengatpiltaina aro dolgni agangrikanio maiba neng·nikanirang donggenchimoba, uarangko namatna nangnikenga,” ine Sangma aganenba, HNLC bobil dolko sorkari baksa agangrikaniona re·bapilchina didiatahachim.
HNLC bobil dolni case-rangko kema ka·china dabienggipani bidingo janapatengon, iandakgipa kamrangde a·dok sorkarini jako ong·ja indiba ma·mong sorkarini jakosa ong·a ine Chief Minister parakatahachim.
HNLC bobil dolni case-rangko, mongsongbate ka·namgijagipa case-rang pilakkon sorkari nipilenba kema ka·na kusi ong·aigen ineba Chief Minister parakataha.
“Indiba ia pilakan a·songni niam bidiko pangchake agangrikanisa ong·na nanggen. Sorkari baksa agangrikanio chinga uamangna (HNLC) naljokgipa ramarangko on·naba ku·rachakenga aro uamangni case-rangko kema ka·ani giminba agangrikanichisa dakna man·gen,” ine Sangma aganaha.