TURA: North Garo Hills a·jani A·dokgre jolo donggipa dingtang dingtang skul nokrang obosta namsrangjahani a·sel poraienggipa chatro chatrirang neng·nikanirangko chagrongna nangtokenga ine A·chik Holistic Awakening Movement (AHAM) A·dokgre unit, A·dokgre Organic Farmers’ Cooperative Society, jolni Nokma Sanerang aro jolo songdongenggipa manderang parakatenba, ia jolrango poraienggipa chatro chatrirangni namgnina ia skul nokrangko tarie on·china a·dokni Education Minister Rakkam A Sangma-ko didiataha.
Iani bidingo A·dokgre-ni dingtang dingtang dolrang, Sombar salo, a·dokni Education Minister-na memorandum-koba on·angaha.
Education Minister-na sedoatgipa chittio, ia NGO-rangni parakatani gitade, A·dokgre jolo donggipa dingtang dingtang skulrang, chong·motan Memilam LP School, Nangilding LP School, Jajil LP School, Dobangal LP School, Ildek Reserve LP School, Dosaram LP School, Reking LP School, Chigrang LP School, Waramja LP School, Gorok LP School aro Tinsimina LP School, ru·uta bilsirangonin nosto ong·e dongengahani a·sel skulo poraienggipa bi·sarang aro skigiparangba neng·nikanirangko chagrongna nangtokengachim.
Ia skul nokrangko ru·uta bilsirangonin taridape on·a dongkujani a·sel nokkingrang selpruprue wachini somoirangode skulrangko ka·na man·rongja ine janapatengon, ia jolrango poraienggipa chatro chatrirangni namgnina ia skul nokrangko ta·raken taridape on·china NGO-rang, Education Minister-ko didiataha.
