SHILLONG: South Garo Hills a·jani Tolegre songo Core Geo Expedition dolni sandie man·gipa gitcham matburingni ro·ong pil·gimin dongsparangko cha·ugipa manderangko police-rang sandina a·bachengengaha aro ia manderangko bakan rim·e nanga gita sasirangko on·gen ine Budbar salo, Siju-Rongara constituency-ni MLA aro a·dokni Education Minister Rakkam A Sangma ku·rachakaniko on·angaha.
Re·anggipa bilsini May jao, Core Geo Expedition dolni manderang, jasa batpile ia jolrangko wenani ja·man, chengoni ro·ong pil·gimin gitcham matburingrangni dongspako Tolegre song sambao donggipa Gongdap songoniko nikchengahachim.
Core Geo Expedition dolni nikani ja·man, Geological Survey of India (GSI) dolni official-rangba re·anggipa bilsio ia biapona re·bae, ia matburingrangara maichim aro badita bilsirangnichim uko tale ma·sie ra·na gita ia biaponiko adita sample-rangko ra·angaha.
Ia gitcham matburingrangni ro·ong pil·gimin dongsparangko nikani ja·man, ia biapko chel·chake rakkina songni manderang aro district administration-ba ia biapona skatang napaniko raken champengatahachim.
Indake ong·genchimoba walgittammangna skang, ma·sina man·gijagipa manderang, ia biapona re·angenba, ro·ong pil·gimin bimangrang chu·gimikkon cho·enba ra·e katangaha ine kobor on·timgiparang parakataha.
Ia gamchatbegipa bosturangko cha·uani bidingo a·dokni Education Minister aro Siju-Rongara MLA, kobor ra·timgiparangna talate on·angengon, “Adita kontarangna skangsan anga an·tangba iani bidingo koborko man·soaha. Songni manderang angna iani bidingo aganataha aro uamang iana Siju police station-o FIR ka·aha. Cha·ugiparangko police-rang sandina a·bachengengaha aro bakan dos dakgipa manderangko rim·e nanga gita sastirangko on·gen,” ine Sangma aganaha.
Ia gamchatbegipa bostuko cha·uaniara namen kragijani ong·aha ine janapatskaengon, “Ia gamchatbegipa bostuara South Garo Hills a·janisan ong·ja indiba Meghalaya aro a·song gimiknian ong·a. Ia bosturangko cha·ugiparang cho·prue ra·angaha indiba chinga bakan dos dakgipa manderangko rim·gen,” ine Minister aganaha.
Tolegre songara uni constituency-ni ning·o ga·akgipa songan ong·a ine janapatskaengon, “Gipin a·songni a·ning bite am·sandigipa manderangsa ia bostuko nikchengahachim aro ia biapo sorkari, museum-ko rikna miksongengachim. Anga an·tangni jolni MLA ong·e iako chu·sokatna krengengachim indiba da·o chinga obostarangko nichengna nanggnok. Ia a·selni bidingo police-rang sandirokgen aro ja·mano anga na·simangna pilakkon u·iatgen,” ine Sangma, kobor ra·timgiparangna aganaha.