TURA: AWAS Plus 2024 (PMAY-G) scheme-na bimingrangko segatanio block official-rangni biming tangka gilaniko rim·a man·genchimode, uandakgipa manderangni kosako rakgipa ja·kurangko de·anggen ine West Garo Hills a·jao donggipa Demdema Block-ni Block Development Officer (BDO) mikrakataniko on·ataha.
PMAY-G scheme-na bimingrangko segatanio mitam VEC-ni dilgiparang, block official-rangni bimingo manderangoniko tangka paisarangko gile ra·enga ine matnanganirangko aro badi ka·anirangko man·soahani gimin Demdema Block-ni BDO, ia mikrakataniko on·angaha.
Ia scheme-na biming segataniara tangka paisa nanggijagipasa ong·a ine jinmana talataniko on·atengon, iandakgipa kamrangko banoba nikgenchimode block office-ona u·iatchina gita Demdema BDO, songni nokni Gaonbura/Nokmarangko aro jinmakoba didiataha.
Adita salrangna skangsan, West Garo Hills a·jani Rajabala constituency ning·o donggipa Gomaijhora songo, Village Employment Council (VEC)-ko dilenggipa mande saksani, PMAY nokna tangka dabiani video-ko manderang nikna man·ahachim.
Ia Gomaijhora songara Demdema C&RD Block ning·o donggipa song ong·achim aro ia video-o VEC-ni dilgipa mande saksa, PMAY scheme-ni namgniko man·enggipa manderangoniko tangka dabie ra·aniko nikna man·ahachim.
