EGH-o AK rifle-ni bang·bea gulirang aro boma bikrokrangko man·a

TURA: East Garo Hills a·jani police-rang, Rongjeng jolo donggipa Chibilbang songni buringoniko, AK rifle-ni bang·bea gulirang, pistol ge·sa aro bilakbegipa bomani bikrokrangko Bristibar pringo man·aha.
Police-rangni u·iatani gitade, koborko man·soani ja·man police-rang, Budbar walonin Chibilbang song sambao donggipa buringoniko sandina a·bachengenba, Bristibar pringo, ia gulirang, pistol aro bomani bikrokrangko man·aha.
Ia silchidare aro gulirangko buringo a·a dape donaha aro police-rang, ia biaponiko mortar shell-ni guli ronggni, a·songo tarigipa pistol pongsa aro AK rifle-ni rong 428 gulirangko man·aha.
“Koborrangko man·soani ja·man chinga Rongjeng police station-ni ning·o donggipa Chibilbang song sambani buringrangoniko Budbar walni 10:00 bajimangonin sandina a·bachengaha aro Bristibar pringwalni 1:00 bajimango, silchidare aro gulirangko, dal·begipa bol pangsani sambao dape donako man·aha,” ine East Garo Hills a·jani Superintendent of Police (SP) AS Rynjah parakataha.
Batanggimin somoirangoba East Garo Hills a·jani dingtang dingtang biaprangoniko GNLA bobil dolni dongnue donanggipa bang·bea silchidarerangko police-rang man·ahachim ine nikna man·a.
Garo Hills-o bobil dake chakatanirang bilongengmiting somoirango, GNLA-ni gitcham commander-in-chief Sohan D Shira sagi, silchidare aro gulirangko Simsang chibimani nalsao donggipa Durama a·brini ja·rekrango dongnue donahachim ineba police-rang u·iataha.
Sohan-ni siangani ja·man, uni dongnue donanggipa bang·bea silchidarerangko police-rang man·ahachim aro da·omangba uni dongnue donanggipa silchidarerangko dingtang dingtang biaprangoniko man·engkua ine nikna man·a.