SHILLONG: Songadam nokadamrango BJP dolmangmangsan namroro silroroaniko ra·bana man·gipa ong·a ine da·o manderang ma·sitokahani gimin re·baenggipa February 21 tariko ong·atenggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-o manderangni chakpaaniko man·gen inenba Meghalaya a·doko Bharatiya Janata Party (BJP)-ko dilenggipa manderang, an·tangtangni ka·dongchakenganiko parakataha.
Iani bidingo kobor ra·timgipa manderang baksa agangrikengon, Meghalaya a·doko bang·a manderangan BJP-ko ra·chaktokengaha aro re·baenggipa February 21 tariko ong·atenggipa district council election-na uamang kamrangko name ka·sona man·engaha ine BJP-ni state spokesperson Mariahom Kharkrang parakataha.
BJP-ni mongsonggipa miksonganian songsalni pilak manderangnan namgnirangko on·na man·na gita a·doko namroro silroroaniko ra·baanian ong·enga ineba ua aganaha.
Kharkrang-ni aganani gitade, BJP-ni bidingo ong·gija dake ma·sisretanirangko bon·atna aro BJP-ni miksonganirangko manderangna u·iatna gita uamang rakbee kamrangko ka·aha.
A·doko songdongenggipa manderangna BJP-ni miksonganirangko u·iatna gita BJP-ni mandal committee-rang, a·dokni pilak biaprangon awareness program-rangko ong·atenga ineba ua aganaha.
BJP-ni bidingo ong·gija dake ma·sisretaniko bon·atna songadam nokadamrango, iandakgipa program-rangko ong·atna nangchongmotenga ineba BJP-ni ku·wattimgipa aganaha.
“BJP-ara badiaba toromnasan kamko ka·aigipa ong·ja indiba namroro silroroaniko ra·bana miksonge kamko ka·gipa party-sa ong·a ine manderangna u·iatna gita chingni pilak mandal-rangan, a·dokni pilak kona noksikrangona re·ange kamrangko ka·enga,” ine Kharkrang aganaha.
BJP-ni kamrangara badiaba jat ba toromnamangmangsan ong·aija indiba pilak jat aro toromrangnan namgniko ra·bana miksongesa kamko ka·enga ineba ua aganaha.
