SHILLONG: Meghalaya a·doko scientific mining ba science-ni bewalo koela bikotaniko a·bachengna ma·mong sorkarini ra·chakangani ja·man, a·doko chonchone koela badinggiparangko rimnapna a·dok sorkari ku·rachakaniko on·angaha.
Meghalaya a·dokni damgittam biaprang, chong·motan West Khasi Hills a·jani Pyndengshalang, East Jaintia Hills a·jani Saryngkham aro East Jaintia Hills a·jani Lumiakhi-Wahsarang-o Science-ni bewalo koela bikotaniko a·bachengna India sorkarini Controller of Coal, re·anggipa January 29 tariko, ia project-rangna songgigrikanio soi ka·ahachim aro ian a·doko koela bikotaniko a·bachengpiltaina namen mongsonggipa ja·ku de·ani ong·ahachim.
A·doko niam gita koela bikotaniko a·bachengna man·engahani gimin kobor ra·timgiparangna talataniko on·angengon, da·o sorkarini minggipin ja·ku de·anide ia kamo chonchone koela badinggiparangkoba rimnapanian ong·enga ine a·dokni Chief Minister Conrad K Sangma parakataha.
Koelarangko bikotna gita licence-na dorgastorangko galanio koela a·damrang, hectare 100-na bate komina nangjawa ingipa niamko taridapchina koela badingenggipa manderangni dabiengani gimin sing·anina Chief Minister, ia kattarangko aganaha.
“Chonchone koela badinggiparangnaba chinga chanchienga indiba da·o dipet chinga India sorkari baksa agangrikna nangkuengani gimin niamrangkode bang·e dingtangatna man·kujanaba gnang,” ine Sangma talataniko on·angaha.
India a·song gimikon ia apsan niamkon ja·rikengani gimin koelarangko bikotna acre 100 biapko ma·mong sorkari donmanaha aro ma·mong sorkari baksa agangrikna man·taikujaskal ia apsan niamkon ja·rikangkuna nangao ga·akenga ineba Chief Minister aganaha.
“Meghalaya a·doko koela bikotaniko a·bachengpiltaina man·nasa nangengani gimin da·o dipet ma·mong sorkarini dongimin niamkon ja·rikkuna chinga tik ka·aha. Koela bikotgipa adita sak manderang licence-rangko man·chengkuchina, uni ja·man ka·sine ia acre 100 nanggipaoniko komiatna gita chinga, ma·mong sorkari baksa agangriktaigen,” ine Chief Minister ku·rachakaniko on·angaha.
