Bijoliko nambate on·na gitasa kimitna nangenga: Power Minister

SHILLONG: East Khasi Hills a·jani Umpling, Lapalang aro samba jolrangko man·chape a·dokni dingtang dingtang biaprango bijoliko kimitna nangenganiara, bijoliko nambate on·na aro mikkangchi bijoli on·anio ka·dongna man·chinasa miksonge ka·enga ine Mongolbar salo, a·dokni Power Minister AT Mondal parakataha.
“Ian bijoliko jakkalenggipa manderangni namgninasa ong·enga maina bijoliko kimitanichi bijoli on·aniko aro transformer-rangko nambatatan baksana HT, LT krongrang aro conductor-rangko te·srena man·enga. Iarangko dakanichi a·dokni manderangnan namgni ong·gen,” ine Mondal, kobor ra·timgiparangna aganaha.
Power Minister-ni aganani gitade, Revamped Distribution Sector Scheme (RDSS)-ni kamrangna bijoliko adita somoirangnade kimitna nangtelenga.
Ia kamrangara mongsongbate, gitcham bijoli krongrangko te·sreani, high-density (HD) line-rangko chatani aro transformer-rangko on·dapani kamrangan ong·enga ineba ua aganaha.
Ia kamrangko ka·enganichi manderangna neng·nikanirangko on·na gita ong·enga ine ku·rachakangengon, iandakgipa neng·nikanirangko man·a dipet uamang komiatna jotton ka·enga ine Power Minister ku·rachakaniko on·angaha.
“Manderangni badi ka·anirangko man·engani giminan chinga kam ka·giparangkoba bariataha, nangchakegipa biaprangkoba komiataha aro bijoli kimitani somoikoba bakkandikataha,” ine ua aganaha.
Ia project-na dongimin somoini bidingo janapatskaengon, “A·dokni pilak biaprangon ia kamrangko ka·enga aro matchotnade adita somoirangko nangaigen. Indiba wachini somoirangode ia kamrangko ka·anio neng·nikanirangko man·gen ine nikesa chinga ia kamrangko wachina skangan matchotatna jotton ka·enga,” ine Mondal parakataha.
Load shedding aro shutdown-ni dingtanggrikaniko talate on·angskaengon, “Da·o dipet a·doko load shedding ba somoi gita bijoli kimitanide dongkujaenga aro da·o kamrangko ka·nasa bijoliko kimitenga,” ine Power Minister aganaha.