Gasuapara-o JJM-ni kamko matchotja ine FIR ka·a

TURA: South Garo Hills a·jani Gasuapara jolrango Jal Jeevan Mission (JJM)-ni kamrangko matchotgija galchipa ine A·chik Dedicated Integrity Leaders (ADIL) Gasuapara regional unit matnangatenba, iani bidingo Sahidur Rehman minggipa contractor-ni kosako Gasuapara Police Station-ni Officer-in-Charge-o FIR ka·doangaha.
ADIL Gasuapara regional unit-ni president S Salgra G Momin-ni parakatani gitade, ia project-ara Ramchengga Scheme-ni ning·o ga·akgipa project ong·achim aro ia project-ni ning·o song dambonga, chong·motan Ramchenga, Konagittim, Jatapara, Kolapara aro Namchapara songrangna gong 4,10,67,000 tangkarangko chamatahachim.
“Indake ong·genchimoba, ia kamko jako ra·e ka·gipa contractor Sahidur Rehman, 30 percent-kosan matchotaiaha aro bangki kamrangkode ka·gija galchipaiaha. Iani a·selan Gasuapara jolrango china neng·nikanirangko man·tokenga,” ine ADIL Gasuapara regional unit-ni president parakataha.
Ia project-ko jako ra·e kam ka·gipa contractor, matchotgija ka·ahani a·sel sorkarina kajina man·anio noksan ong·na nangaha ineba Momin parakataha.
Ia project-ni bidingo inquiry-ko dakenba, ia contractor-ni kosako nanga gita ja·kurangko de·chinaba ADIL Gasuapara regional unit, Gasuapara Police Station-ni OC-ko didiataha.