SHILLONG: Tangka paisarang dongani krisa a·dokni dingtang dingtang biaprango gital administrative block-rangko kulina man·aigen ine Mongolbar salo, a·dokni Community & Rural Development (C&RD) Minister AT Mondal parakataha.
Iani bidingo kobor ra·timgiparangna talataniko on·angengon, a·dokni dingtang dingtang biaprango gital block-rangko kulidapchina dabitokengoba, ia gital block-rangko kulina skangba tangka paisa donganiko sorkari nichengna nanggen ine a·dokni C&RD Minister parakataha.
A·dokni dingtang dingtang biaprango gital block-rangko kulichina dabianirangko sorkari man·soenga ine janapatengon, iandakgipa dabianirangko sorkari name nichengkuenga ine Mondal aganaha.
Adita salrangna skangsan a·dokni 56-gipa block-ko Mawhati-o, a·dokni Chief Minister Conrad K Sangma, oprake on·angahachim.
Re·anggipa bilsio, Mawhati-ni MLA Charles Marngar aro gipin MLA-rang, National People’s Party (NPP)-o napangani ja·mansa ia gital block-ko kulina sorkari tik ka·ahachim.
Mawhati-o gital block-ko kulina tik ka·ani bidingo talataniko on·angengon, ia jolrangara gipin block-rangoni chel·grikani giminsa ia gital block-ko kulina sorkari tik ka·aha ine C&RD Minister parakataha.
“Mawhati-ara a·doko diltubatsranggipa biaprangoni damsa ong·a aro manderang, block headquarter-ona sokna gita km 80-90 ong·gipa ramako songre songgabatna nangani giminsa Mawhati-o gital block-ko kulina tik ka·aha,” ine ua aganaha.