Ia jolrango skatang am·sandianirangko dakna on·jawa: Nokmarang
BAGHMARA: South Garo Hills a·jani Tolegre songo sandie man·gipa gitcham matburingni ro·ong pil·gimin dongsparangko cha·ugipa manderangko rim·na man·kujaengon, ia jolrangoniko Geological Survey of India (GSI), Nokmarangni permission gri am·sandianirangko dakahani a·selsa ia biapni gamchatgipa bosturangko cha·uaona sokaha ine Tolegre jolni komibeoba damsni songni Nokmarang matnangatskaaha.
Tolegre songo man·gipa ‘fossil’-rangko cha·uani ja·man ia jolo donggipa damsni A·king Nokmarang, chong·motan Tolegre, Jadigindam, Paromgre, Emangre, Asakgre, Dabalgre aro Nokatgre-ni Nokmarang, re·anggipa Sonibar salo tom·aniko ong·atangenba, ia a·selko raken jegaltokaha aro mikkangchi iandakgipa obostarang ong·taijana gita ia songrango skatang napaniko aro niam gri am·sandianirangko champengna tik ka·e donangaha.
Ia tom·aniko ong·atani bidingo talataniko on·angengon, “Ia jolrangoniko GSI, niam gri am·sandianirangko dakaha aro uamangan ia biapo donggipa gamchatgipa bosturangko cha·uanioba jak dongna nanga ine chinga chanchichipenga. Uamang chingni a·kingrangona chingni permission gri aro u·iatchenga gri re·bae, am·sandianirangko dakahani gimin chinga namen suk ong·ja aro iani bidingo chinga dingtang FIR-ko ka·na miksongenga,” ine Nokmarangni pal dolni saksa Altar R Marak aganaha.
Ia A·kingrango, GSI-ni am·sandianirangko Nokmarang chu·gimik champengatsrangnaba tik ka·e donangaha.
“Ia a·selni bidingo sandirokanirangko matchotkujaskal chinga pilak dake am·sandianirangkon champengatna tik ka·angaha aro sakoba ia songrangona re·bae, cha·ue ra·anirangko rim·a man·genchimode, chinga ia manderangko rim·enba police-rangna on·gen aro unbaksana uamangoniko gong lak 10 tangkarangko dai ra·gen,” ine Marak aganaha.
Ia jolrango iandakgipa bostu ba bimangrangko niktaigenchimode, uarangko GSI-na talbate am·sandina on·jawa aro A·king Nokmarang an·tangtangan am·sandianirangko dakgen ineba ia tom·anio A·king Nokmarang tik ka·e donangaha.
“Badiaba dolrang ia biaprangona am·sandianirangko dakna re·bagenchimode skanggipa joltangtangni A·king Nokmarangoniko no objection certificate (NOC)-rangko ra·chengna nanggen aro songni Nokmarang uamangna dilgiparangko on·gen. Dingtang dingtang rong·kolrangko am·sandiengon, ia jolrangona re·baenggipa dolantian, an·tangtangni ra·baenggipa chu·gimik ostro aro bosturangko mesokchengna nanggen aro re·angpilani somoioba apsankon dakna nanggen ineba chinga ia tom·anio tik ka·angaha,” ine Marak parakataha.