Lakprako sak 176 manderang cancer saaniko man·giparang ong·a: Ampareen
SHILLONG: Meghalaya a·doko cancer man·ani average, a·songni average-nan batengani gimin ian a·dokna namen jajrengna nangani ong·enga.
World Cancer Day-ko manianio a·dokni Health Minister Ampareen Lyngdoh, jinmana aganprakangengon, Indian Council of Medical Research (ICMR)-ni data-o parakani gitade, Meghalaya a·doko songdongenggipa lak 1 manderangoni sak 176 manderangde cancer man·giparang ong·a ine parakataha.
A·songni average-o lak 1 manderangoni sak 100-mangni gita cancer man·giparang ong·engon, East Khasi Hills a·jamangmangon lakprako sak 227 manderang, cancer saaniko man·giparang ong·skaenga ine Lyngdoh aganaha.
Iani bidingo kenchakna nanganiko janapatengon, cancer saaniko man·gipa mande sakprakan dingtang dingtang neng·nikanirangko man·engani gimin sorkari, cancer saaniko man·gipa sakpraknan simsak nirokaniko on·na gisik on·e kamko ka·enga ine Health Minister parakataha.
Cancer sagiparangko sanna bananio kamrangko nambatatna gita North Eastern Indira Gandhi Regional Institute of Health & Medical Sciences (NEIGRIHMS)-o sanna banani cholrangko namdapatenga aro bakan cancer porikka ra·e nianikoba a·bachengatna sienga ineba Lyngdoh aganaha.
Shillong Civil Hospital-ni cancer wing-ko ge 200 palangrang donge dal·batatna sorkari miksongenga ine u·iatengon, a·doko man·enggipa sanna banani cholrango ka·dongchina ua a·dokni manderangko didiataha.
Meghalaya a·doko cancer saaniko warachakna gita a·dok sorkari, ‘Meghalaya Can Care’ project-ko mission mode-o a·bachengatenga ineba Health Minister parakataha.
Specialist doctor-rangni chu·onggijaniko namatna gita a·dok sorkari, doctor-rangko advanced training-na watatenga ineba Lyngdoh aganaha.
Assam-ni Guwahati Medical College & Hospital (GMCH)-ko man·chape a·dok sorkari, dingtang dingtang medical institute-rang baksa nangrime kamko ka·enga ine u·iatengon, chel·a biaprangona re·ange sanna bananirangko ra·gija a·doktango man·enggipa sanna banani cholrangko ra·china gitaba Health Minister, a·dokni manderangko didiataha.