TURA: Micro, Small & Medium Enterprise (MSME)-ni miksonganirangko nambate chu·sokatna man·na gita Budbar salo, RBI Shillong-ni gita dingtangmancha Town Hall Meeting-ko West Garo Hills a·jani Selsella-o ong·atangaha.
Ia program-ko dingtangmancha Selsella jolrango Cashewnut Cluster aro Cane & Bamboo Cluster-na ong·atangaha aro ia program-o sak 200-mangni gita MSME bading chiwalgiparang bak ra·angtokaha.
Ia tom·anio, RBI Shillong-ni Deputy General Manager (DGM) Navneet Singh Nagar, ia tom·aniko ong·atani bidingo jinmana talate on·angengon, ia Town Hall program-ara, dingtang dingtang bading chiwalgiparang, banker-rang, sorkari official-rang aro regulator-rangna apsan tom·rimna namgipa chol ong·a ine parakangaha.
Iandakgipa program-rangara, MSME-rangni chagrongna nangenggipa dingtang dingtang neng·nikanirangko namatna gita namgipa chol ong·a ineba Nagar aganaha.
Ia program-ko ong·atanio West Garo Hills District Commerce & Industries Centre (DCIC)-ni General Manager Don Felicent R Marak-ba jinmana aganprakangengon, MSME sector-ko namdapatna gita a·dok sorkarini ra·gate on·gipa dingtang dingtang scheme-rang, jekai PM Viswakarma Scheme aro uandakgipa scheme-rangni gimin agan-talatanirangko on·angenba, bimingtangtangko segate iandakgipa scheme-ni namgnirangko ra·china manderangko didiangaha.
Iani ja·man, MSME sector-na ma·mong sorkarini ra·gatgipa dingtang dingtang scheme-rangni bidingo MSME-DFO-ni Assistant Director Durgesh Pandey, jinmana agan-talate on·angskaaha.
Ia program-ko ong·atanio Selsella C&RD Block aro dingtang dingtang bank-ni official-rangba dongpae, dingtang dingtang kamrangni bidingo manderangna agan-talatanirangko on·angaha.
