SHILLONG: Re·baenggipa February 21 tariko ong·atenggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-na United Democratic Party (UDP)-ni ming 20 ku·rachakanirang donggipa manifesto ba program-ko Budbar salo, UDP-ni dilgiparang oprakataha.
Ia chang KHADC aro JHADC election-o UDP, sak 40 candidate-rangko susaatenga aro ia sak 40-oni sak 23-de KHADC-o aro sak 17-de JHADC-o susaenga.
Ia manifesto-ko oprakatani ja·man kobor ra·timgiparangna talataniko on·angengon, ia MDC election-o UDP-ni mongsonggipa ku·rachakaniranga, Indian Constitution-ni Sixth Schedule-ko bil gnangbatatna aro be·enni gita cholgri ong·gipa manderangna 3 percent job reservation-ko on·anian ong·enga ine KHADC-ni gitcham CEM Titosstarwell Chyne parakataha.
Chyne-ni aganani gitade, UDP-ni manifesto-o gipin mongsonggipa ku·rachakaniranga, a·dokni dingtang dingtang biaprango rong·mesak bikotna jotton ka·aniko jegalani aro Uniform Civil Code (UCC) ra·gataniko jegalanian ong·enga.
“Chingni mongsonggipa ku·rachakanirangde, be·enni gita cholgri ong·gipa manderangna district council-o 3 percent job reservation-ko on·anian ong·enga aro ian political dolrangni skanggipa changna jako ra·enganiba ong·enga. Chinga Executive Council-ko rikna gita seokako man·genchimode iako chu·sokgipa ong·attelgen,” ine Chyne aganaha.
Autonomous District Council (ADC)-rangko mangrakbatatna nangenga ine janapatengon, “ADC-rango bil man·aniko bariatna chinga nangnikenga, mongsongbate a·arangni kosako bil man·aniko aro minggipinde Sixth Schedule-ni paragraph 3-o pangchake,” ine Sohra-ni MDC aganaha.
Assam a·dok baksa simarango meligrikna man·jaenggipani bidingo janapatskaengon, UDP-ni nangnikanide elaka-ni simarangan Meghalaya a·dokni simarang ong·na nanga ine Chyne parakataha.
Ia manifesto-ko oprakanio, a·dokni Cabinet Minister Paul Lyngdoh, UDP-ni general secretary Jemino Mawthoh, UDP-ni MLA-MDC-rang aro gipin dilgiparangba dongpae bak ra·angtokaha.
