RESUBELPARA: 100 day Tuberculosis (TB) Free Campaign-ni bak gita Sukrobar salo, East Garo Hills a·jani District Tuberculosis Office, North Garo Hills a·jani District Medical & Health Office baksa nangrime, TB free Camp-ko Mendipathar-ni Multipurpose Cooperative Society Hall-o ong·atangaha.
TB saaniko champengna gita manderangna mikrakatanirangko on·na aro sabisiko chel·chakanio sanna bananirangko on·na gita ia program-ko ong·atangaha.
Ia program-ko ong·atanio, Mendipathar-ni MLA Marthon J Sangma, mongsonggipa sokgipa ong·e, jinmana aganprakengon, TB sagiparangko mitchie mesokani a·selan TB sagipa manderang, sanna bananirangko ra·na re·bana kratcha·tokenga ine TB sagiparangko mitchijachina didiangaha.
Ia sal somoirango, dingtang dingtang technology ba gital kolrangchi kenbegnigipa sabisirangko sanna banna man·engaha ineba ua aganaha.
TB sagiparangna chu·gimik dakchakanirangko on·enganichi sorkari, TB saaniko bon·atsrangna rakbee kamrangko ka·enga ineba Sangma aganaha.
TB saaniko bon·atna kam ka·anio pilakkon bakrimchina gitaba ua didiangaha.
2030 bilsini gisepon a·gilsak gimiko aro 2025 bilsini gisepon India a·songo TB saanichi mande sianiko komiatna gita India sorkari, 100 day Intensified TB Elimination Campaign-ko ra·gatangahachim ine nikna man·a.
Ia tom·anio, North Garo Hills a·jani Additional Deputy Commissioner Rezia Sangma-ba jinmana aganprakengon, ia campaign-o budepa butchuma ba TB man·gipa biaprangosan ong·aigija, TB saaniko man·na altugipa bi·sarangnaba simsak nirokanirangko dakchina didiangaha.
Ia program-ko ong·atanio dongpae, jinmana aganprakanggipa gipin manderangara, East Garo Hills a·jani District Tuberculosis Officer Dr CP Sangma, NCD-ni Nodal Officer Dr Arfina M Sangma, North Garo Hills a·jani DM&HO Dr Priya SR Sangma aro gipinrang ong·a.
Ia program-ko ong·atanio, TB sagiparangna dingtangmancha namnamgipa cha·anirangkoba Mendipathar MLA-ni jakchi suale on·angaha.
