TURA: Batanggimin somoirangonin West Garo Hills a·jani a·kawe jolrango niam gri chalaienggipa ita so·ani karkanarangko chipna gita sorkari rakbee kamrangko ka·engon, da·oba changsataie, Rajabala constituency-ni ning·o ita so·ani karkanarang ong·kattaiaha ine kobor on·aha.
Kobor on·timgiparangni u·iatani gitade, ia ita so·ani karkanarangko, Gomaijhora, Balujhora Borobasra, Shialkandi, Nayagaon, Rajpur aro uandakgipa songrango bang·en nikna man·taiengaha.
Ia ita so·ani karkanarangara, manderangni songdongchakenggipa song sambaon ong·e, manderangna namgijaniko ong·atenga aro ia ita so·ani karkanarangna bang·en bolrangkoba jakkalengani gimin samba jolrango donggipa buring bolgrimrangni bol wa·arang bon·angtokengaha ineba kobor on·timgiparang parakataha.
Iandakgipa ita so·ani karkanarangara mandenasan ong·aigija samtangtango ong·telaigipa sam bolrangnaba nangchakeaniko ra·baengani gimin kachari aro a·dok sorkarioniba iandakgipa karkarangko chalaijachina ge·etaniko on·manahachim ine nikna man·a.
Ia karkanarangko re·anggipa bilsioba ia apsan jolrangon nikna man·ahachim aro da·oba changsataie ia ita so·ani karkanarangko ia songrango chalaitaiengahani gimin ian mandena aro samtangtango ong·telaigiparangna nangchakeaniko ra·baenga ine kobor on·timgiparang parakataha.
Kobor on·timgiparangni aganani gitade, ia jolrango ita so·ani karkanarangko kulina man·jana gita nirok sandichina a·dokni aro GHADC-ni forest department-na ge·etaniko on·manahachim indiba nirok sandianirango olgrokani a·sel da·o ia jolrango dam 1000-mangni gita ita so·ani karkanarangko chalaitaiengaha.
“Re·anggipa bilsion ia jolrango ita so·ani karkanarangko chalaiani bidingo bang·en badi ka·ahachim indiba da·alona kingkingan iandakgipa karkanarangko name nirok sandianirang dongjaenga. Ian jolo songdongenggipa manderangni an·seng baljokanio nangchakeaniko ra·baan baksana samba jolrango donggipa buring bolgrimrangnaba nangchakeaniko ra·baenga,” ine jolo songdongenggipa manderang parakataha.
