TURA: Chokpot Civil Sub Division-ni ning·o donggipa, Alagre Community Health Centre (CHC)-o kam ka·enggipa manderang aro songo dongenggipa manderang, darangni nirok simsakaniko man·jani a·selo bang·a neng·nikanirangko chagrongna nangenga ine FKJGP Deku Circle-ni President Grimbal Ch. Marak uni suk ong·gijaniko parakaha. Indake FKJGP Deku Circle-ni President-ni aganani gitade, Alagre CHC-o, songni manderang dingtang dingtangrangchi neng·nikanirangko man·enganiko uamang parakaha. Alagre CHC-o bilongbe·e saanirangko man·e donggipa manderangna emergency service-ko on·enggipa ambulance bolgni donggipaan nosto ong·e tarigija galchipe dongipasa ong·ani gimin, CHC-ni staff-rang an·tangtangni private gariko ba para garikosa para game jakkalskana nangao ga·akenga aro ian kraaniba ong·ja. Una agreba, chirangko chu·onga gita man·jani a·selo hospital kam ka·enggiparang aro saenggiparangan bang·a neng·nikanirangko chagrongna nangao ga·akenga unbaksana, CHC-ni compound-o donggipa pakmani be·dapanichi nalarangko a·a dapani a·sel wachini somoirango nalagita chirang jokrurana man·jae hospital nokningachina chirang napanichi sagiparangna dongtimenggiparang neng·nikaniko man·enga aro bijoli nirokgiparangko dingtangmancha rakkigipa mande dongjani a·selo nosto ong·ani somoirango namen neng·nikaniko man·enga ineba uamang parakaha. Una agreba, uamang mobile network namjani a·sel, doctor aro nurse-rangko nanggitakani somoirangko, ta·rake kobor on·na gita man·jani giminba bang·a neng·nikanirangko man·enga ineba parakaha. Indake, ia songo dongenggipa manderangni ia Community Health Centre-o bang·arangchin neng·nikanirangko man·e dongenganiko ta·rake nirokatpachina, FKJGP Deku Circle-ni gita, Chokpot-ni MLA, Sengchim N. Sangma-ko molmolataha.
