SHILLONG: 2027 bilsio chang 39-gipa National Games-ko sokachakna Indian Olympic Association (IOA) aro ma·mong sorkari ra·chakmanahani gimin ia chang 39-National Games-ko Meghalaya a·doko sokachakna man·gnok.
Iani bidingo a·dokni Sports & Youth Affairs Minister Shakliar Warjri, IOA aro ma·mong sorkarioni u·iataniko man·soani ja·man Robibar salo, kobor ra·timgiparangna parakataha.
Warjri-ni aganani gitade, 2027 bilsio chang 39-gipa National Games-ko Meghalaya a·doko sokachakna ua New Delhi-ona re·ange, Union Sports Minister Mansukh Mandaviya baksaba agangrikahachim.
“A·dokni Chief Minister Conrad K Sangma-ni dilanichi da·o chinga chang 39-gipa National Games-ko sokachakna ra·chake seatgipa chittiko man·soaha,” ine a·dokni Sports Minister parakataha.
Ia chang 39-gipa National Games-ko sokachakna cholko man·enganiara kal·susaanirango gisik nanggipa a·dokni chadamberangna nambegipa chol ong·enga ine janapatengon, ia cholko an·tangtangni namgnina ra·china gita kal·susaanirango gisik nanggipa chadamberangko Warjri didiataha.
“Kal·susaanirangko namnikgipa chadamberangna sorkari aro anga an·tangba cholrangko on·na rakbee kamko ka·enga aro anga ka·donga uamang, ia cholrangko an·tangtangni namgnina ra·gen,” ine ua aganaha.
Uttarakhand a·doko ong·atenggipa National Games-o medal-rangko cheahani gimin ua, dingtangmancha a·dokni chadamberangnaba an·tangni namgipa skaniko on·ataha.
Ia 2025 bilsio National Games-ko Uttarakhand a·doko sokachakenga indiba 2026 bilsiode India a·songo Asian Games-ko sokachakengani gimin National Games-ko ong·atskajaenga aro uni ja·man 2027 bilsiode chang 39-gipa National Games-ko Meghalaya-o sokachakna man·skagnok.
