SHILLONG: Da·o jasnini gisepon, National People’s Party (NPP)-chi dilenggipa Meghalaya Democratic Alliance (MDA) 2.0 sorkariko chalaiani bilsigni ata gapna siengahaon, MDA cabinet-o Bharatiya Janata Party (BJP)-ni MLA sakgni, biapko te·sregenma te·srejawa iani gimin manderangni gisepo, agan-golpogrikanirang ong·kattaina a·bachengengaha.
Da·o dipet MDA sorkario, Pynthorumkhrah-ni BJP MLA AL Hek-sa Cabinet minister ong·e kamko ka·enga indiba BJP-ni sakgipin MLA Sanbor Shullai-de cabinet-o biapko man·skakujaengachim ine nikna man·a.
BJP MLA sakgnini gisepo, Cabinet-ni biapko sualgrike ra·na gita chanchia dongama dongkuja ine sing·anina aganchakaniko on·angengon, Cabinet-ni biapko te·srena gita ma·mongoni maming ge·etaniba dongkuja aro iani bidingo chanchiaba dongkuja ine BJP-ni kobor on·timgiparang parakataha.
Hek aro Shullai-ni gisepo biap sualgrike ra·aniko Meghalaya a·doko BJP-ni gitcham dilgiparangsa dakdilchengahachim ineba kobor on·timgiparang parakataha.
Cabinet-o bilsigni ata ka·e BJP MLA sakgnini sualgrikani bidingo janapatengon, ian a·doko BJP-ko dilenggiparangni kamsan ong·aia aro ma·mongonide iani bidingo maming ge·etanirang dongja ine BJP-oni kobor on·timgiparang parakataha.
Kobor on·timgiparangni parakatani gitade, 2023 bilsio MDA 2.0 sorkariko rikchengani somoio BJP-ni MLA AL Hek-ko minister songchinasa BJP-ni national president JP Nadda, Meghalaya a·doko BJP-ni dilgiparangna u·iataniko on·ataiaha indiba badita bilsina uko minister songna nanga uni giminde mamingkoba u·iatjahachim.
Da·o MDA 2.0 sorkari, bilsigni ata gapna siengahaon, a·doko BJP-ko dilenggiparangni tik ka·gimin gitan Cabinet-ni biapko BJP-ni sakgipin MLA-na on·skagenma ine sing·anirangba ong·katskaengaha.
Da·o Meghalaya a·doko Rikman Momin-an BJP-ni state president ong·engani gimin iako jako ra·ani aro MLA sakgninan name u·iatanide uni daitoan ong·enga ine kobor on·timgiparang parakataha.
Koborko on·ani gitade, ia songgigrikanio Hek aro Shullai sakgnian soi ka·grikahachim.
