RESUBELPARA: Meghalaya Pradesh Youth Congress (MPYC)-ni gital president Timjim Momin-ko mande ra·e rimchaksona gita Sombar salo, dingtangmancha bike rally-ko North Garo Hills a·jao ong·atangaha.
Ia bike rally-ko Assam-o donggipa Damra-oni North Garo Hills a·jani Mendipathar-ona ong·ataha aro uni ja·man MPYC-ni gital president-ko rimchaksona gita dingtangmancha jinma tom·anikoba ong·atangaha.
Timjim K Momin-ko re·anggipa Bristibar salo, Indian Youth Congress-ni president Uday Bhanu Chib, Meghalaya Pradesh Youth Congress (MPYC)-ni gital president dake, Delhi-o songe on·angahachim.
Bilsi 32 ong·gipa Timjim K Momin, IIT Guwahati-oni M.Tech-ko pass ka·gipa chadambe ong·a aro ua 2023 bilsini Assembly election-o Congress dolni tikitchi, Mendipathar constituency-o susaahachim. 2023 bilsini Assembly election-o NPP-ni Marthon J Sangma, Mendipathar-o seokako man·taiaha aro Timjim Momin, gnigipa biapkosan man·rikaiahachim.
Batanggimin antirangonin Youth Congress-ni gital dilgiparangko seokna gita election-ko ong·atahachim aro MPYC-ni gital president-na Timjim-ko man·chape sakgittam candidate-rang susaahachim.
Uko mande ra·bee rimchaksona gita tom·aniko ong·atanio ua jinmana aganprakangengon, onbatgipa gadangonin Congress dolko mangrakbatatna MPYC-ni gital president Momin ku·rachakaniko on·angaha.
