WILLIAMNAGAR: Williamnagar-ni District Planning Office ning·o dingtangmancha Library-cum-Career Guidance Centre-ko Sombar salo a·dokni PHE Minister aro Williamnagar-ni MLA Marcuise N Marak, nokdonggae on·angaha aro ia library-ko nokdonggae on·anganio, East Garo Hills a·jani Deputy Commissioner Vibhor Aggarwal, Superintendent of Police (SP) SA Rynjah, dingtang dingtang skul-college-rangni principal-rang, chatro chatrirang aro gipinrangba dongpae bak ra·angtokaha.
Ia library aro career guidance centre-ko nokdonggae on·angani somoio a·dokni Cabinet Minister, jinmana aganprakangengon, ia centre-ko Williamnagar-o kuliahani gimin East Garo Hills a·jani Deputy Commissioner-ko mittelpilangaha aro ia career guidance centre-o on·enggipa dingtang dingtang cholrangko ra·china chatro chatrirangko didiangaha.
Ia tom·anio, East Garo Hills a·jani Deputy Commissioner Vibhor Aggarwal-ba jinmana aganprakangengon, ia library-ara dingtang dingtang kamrangna jakkalgipa centre-ba ong·gen aro ia centre-o jolni chatro chatrirang, dingtang dingtang porikkarangko sena gita agan-ku·pattianirangko ra·na man·gen ine parakataha.
Ia tom·anio jinmana aganprakanggipin manderangara, East Garo Hills a·jani SP SA Rynjah, Loyola College aro Secondary School-ni chatro chatrirang ong·a.
Mittelpilani kattarangko District Planning Officer aro ADC DA Sangma agangskaaha.
