SHILLONG: Meghalaya a·doko SSLC aro HSSLC porikkarangko seani, jillarangode result-rang namengoba songadam nokadamrango porikka seanirang namjabatengani gimin ia changode sorkari, dingtang dingtang program-rangko ra·gatanichi, result-rang nambatna ka·dongenga ine Sombar salo, a·dokni Education Minister Rakkam A Sangma parakataha.
“Jillarango pilak skulrangan name dakenga indiba songadam nokadamrangosa porikka seanirang namjaengani gimin chinga pilak gadangon porikka seaniko nambatatna jotton ka·enga aro ia changode chinga nambata result-rangko man·na ka·dongenga. Songadam nokadamrango chatro chatrirangna didianirang komiani gimin ia changode chinga man·a dipet dakchakanirangko on·na jotton ka·aha aro ia changode nambata result-rangko man·na chinga ka·dongenga,” ine Sangma aganaha.
A·doko CM Impact Supplementary Class aro Exam gita dakgipa program-rangko ra·gatanichi sorkari, skulrango porikka seanirangko namdapatna jotton ka·ahani gimin ia changode nambata result-rangko man·na ka·dongenga ineba Education Minister parakataha.
SSLC aro HSSLC porikkarangni bidingo janapatengon, “Ia bilsio sak 64,387-mangni gita SSLC-ko aro sak 29,773-mangni gita chatro chatrirang HSSLC porikkako seenga. Anga uamang pilaknan an·tangni namgipa skaniko on·atenga aro uamang porikkao chu·sokgipa ong·china,” ine Sangma aganaha.
Re·anggipa bilsini result-rang uamangni ka·dongsoani gita ong·jaha ine parakatengon, “Chatro chatrirangko nambate dakchina chinga didienga aro porikka seani somoirango pilakkon guale an·tangtangni poraianirango gisik on·china mol·molenga. Ian an·chingni janggi tanganiko dingtangatna man·gipa ong·ani gimin namen nangchongmotgipa ong·a,” ine Education Minister aganaha.
Gital academic year-ko a·bachengatani bidingo janapatskaengon, “An·chingni a·dok lekka porani a·bao bang·en on·gilna gita chol donggipa ong·a indiba banoba maiba ong·engani a·selsa an·chingni nangnika gita result-rangko man·jaenga. Uni gimin ia changde nambate dakchina chinga skul aro college-ni dilgiparangko aro chatro chatrirangkoba mol·molenga,” ine Sangma aganaha.
