SHILLONG: Re·baenggipa February 21 tariko ong·atenggipa KHADC aro JHADC election-na skang, National People’s Party (NPP)-chi dilenggipa Meghalaya Democratic Alliance (MDA) sorkariko tangka paisa jakkalsretanina aro ong·gija kamrangna dingtang dingtang opposition dolrang matnangtokengon, 2018 bilsio sorkariko rikchenga intal MDA sorkari, a·doko namroro silroroaniko ra·bana gong kror 38,000-na komigija tangka paisarangko man·bae on·aha indiba iani giminde darangan sing·e nia dongja ine a·dokni Deputy Chief Minister aro NPP-ni state president Prestone Tynsong parakataha.
“A·dokni namroro silroroanina ia tangkarangko chinga maikai man·bae on·aha, iani giminde maini gimin opposition dolrang sing·jaenga. Indita tangkarangko NPP-ni dilgiparang banoniko man·bae on·aha ukoba uamang sing·na nangachim,” ine Tynsong, Langkyrdem-Laitkroh constituency-o NPP-ni candidate Rahboklang Tynsong-na campaign ka·engmiting somoio aganaha.
Tynsong-ni parakatani gitade, dingtang dingtang department aro agency-rang gita NPP-chi dilenggipa sorkari, a·dokni dingtang dingtang biaprango namroro silroroaniko ra·bana bang·bea project-rangko ra·bana man·aha.
A·doko gital bikotgipa political party-ni mongsonggipa miksonganian a·dokni chief minister, MLA Gavin Miquel Mylliem aro deputy chief minister-ko matnanganisa ong·a ineba ua, Voice of the People’s Party (VPP)-ko biming minggija aganaha.
“Ian matnanganisan ong·aiani gimin anga an·tangde mamingba ong·ja indiba maikai NPP, Conrad Sangma aro Prestone Tynsong, a·dokko nitoatna gita indita tangka paisarangko ra·sekbana man·aha, ukoba uamang matnangna nanga,” ine NPP-ni state president aganaha.
2003 bilsioni 2017 bilsini December jaona kingking ua Congress dol baksa ong·aha ine janapatengon, “A·doko namroro silroroaniko ra·bana man·engani giminsa opposition dolrang, NPP-ni kosako mikbue matnanganirangko daktokenga. Angni NPP-o napaniara angna pattianisa ine anga bebera·a. Manderang matnangkuaigenchimoba NPP-de dal·roroangkuaigen,” ine Tynsong parakataha.
Congress dolo gita ong·gija NPP-ode ning·in ning·in meligrikgijanirang dongja aro party-ni pilak membor-rangan saksa sakgipinko mande ra·e aro ka·sagrikesa jakkala ineba NPP-ni dilgipa aganaha.
NPP-ode cabinet-ni biapna ba party tikitna seksekanirangba dongja ineba ua parakataha.