SHILLONG: Khasi Hills Autonomous District Council (KHADC) election-ko re·baenggipa February 21 tarikon ong·atna siengahaon, KHADC-ni electoral roll-rango Tribal ong·gijagipa manderangni bimingrangba donga ine KHADC-ni Chief Executive Membor (CEM) Pyniaid Sing Syiem parakatenba, election-na skang electoral roll-rangko gital dake nipiltaichina dabiangaha.
Iani bidingo East Khasi Hills a·jani Deputy Commissioner RM Kurbah-na badi ka·e sedoatengon, KHADC election-o gipin jatrangde pu·onna man·jana gita election-na skangan electoral roll-rangko name nipiltaina nangchongmotenga ine KHADC-ni CEM parakataha.
“Election-ko ong·atna an·ching tarisamsoengon, Khasi Hills-o pu·onna bil donggipa manderangko electoral roll-rango segatna nangenga aro bil donggijagipa manderangko den·galskana nangengani gimin electoral roll-rangko name nipilna nangenga. KHADC-ni electoral roll-rango Non-Tribal aro Khasi ong·gijagipa manderangni bimingrangba dongani gimin electoral roll-rangko gital dake nipiltaichina anga mol·molenga. Electoral roll-rangko nipiltaianichi, election-ko kraa bewalo ong·atna man·gen,” ine KHADC-ni CEM parakataha.
Electoral roll-rangko somoi gita nipiltaichina didiatengon, election-ko ong·atanio, pu·onna bil donggipa manderangsan bak ra·na man·na gita ia electoral roll-rangko nipilchina ine Syiem, East Khasi Hills a·jani Deputy Commissioner-ko didiataha.
Da·o dipet Garo Hills Autonomous District Council (GHADC)-ona agre KHADC aro JHADC damgnion Non-Tribal-rangde district council-ni dilgiparangko seokanio bak ra·na man·kujaengachim.
