SHILLONG: National People’s Party (NPP)-chi dilenggipa Meghalaya Democratic Alliance (MDA) sorkariko tangka paisa jakkalsretanina aro ong·gija kamrangna opposition dolrang matnangtokengon, MDA sorkarini kosako sakkirang donggenchimode FIR ka·china a·dokni Deputy Chief Minister aro NPP-ni state president Prestone Tynsong ra·biatskaaha.
“Ong·gija kamrango jak donga ine sakkirang donga ong·ode maina FIR ka·jaenga? Sorkario ong·enggipa manderangni kosakode FIR ka·na man·ja ine anga uamangni agananirangko knaenga. Indiba MDA sorkarini kosako matnanganiranga kakket ong·ja,” ine Tynsong aganaha.
Langkyrdem-Laitkroh constituency-o NPP-ni candidate ong·e susaenggipa Rahboklang Tynsong-na campaign ka·engmiting somoio ua ia kattarangko aganaha.
MDA sorkarini kosako iandake matnangani ja·man maina jrip dongenga ineba Tynsong, dingtang dingtang opposition dolrangko sing·doangaha.
“Uamangni matnanganirangara maming pangchakani grigipasan ong·aia. Anga saksa Deputy Chief Minister ong·e niamko rakkigipa ong·na nanga aro anga maiba ong·gija kamko ka·a ong·ode angaba sastiko man·na nanga,” ine ua aganaha.
Tynsong-ni aganani gitade, Chief Minister aro Deputy CM-ni palango tangkarangan balboe dongpilenga ineba opposition dolrang matnangtokahachim.
Mitam dolrang, uni kosako aro NPP MLA Gavin Mylliem-ni kosako matnangronga ine janapatengon, “Sakki gri skatang matnanganiara kraani aro nama ong·ja,” ine ua aganenba, sakgipinko jaksi otna skang an·tangtangni kamrangko nichengchina opposition dolrangko didiataha.
NPP-chi dilenggipa MDA sorkariko, a·doko niam gri koela bikotanina aro salruraanirangnaba dingtang dingtang dolrang matnangtokengachim ine nikna man·a.
Da·o KHADC aro JHADC election sepangbatrorobaengahaon, dingtang dingtang political dolrangni matnanggrikanirangkoba nikna man·skaengahachim.