SHILLONG: Mongolbar salo, Ri Bhoi a·jani Nongpoh jolo, dud palgipa mande saksako Assam Rifles dolni gari bolsa salpakaha aro ia mande, gari salpakako man·e ja·mano siangna gita nangaha.
Kobor on·timgiparangni u·iatani gitade, ia mandeara, Shangbangla songoni bilsi 69 ong·gipa Bahadur Sunar ong·achim aro ua Nongpoh jolrango dudko pale cha·engachim.
Mongolbar pringo, Assam Rifles-ni director general-ko Guwahati Airport-ona re·dilangenggipa ML-05Y 3232 escort gari, Nongpoh-ni DC office sambao, ia mandeni cycle-o ramako re·sotangengmiting somoio salgakeaha aro uko salgakani ja·man ia gari, ramako pekwatna tarigipaoba su·gakaha ine kobor on·timgiparang u·iataha.
A·sel ong·ani ja·man bakan ia mandeko sanna gita Nongpoh Civil Hospital-ona ra·angaha indiba ua bilongbee saknaanirangko man·ahani gimin nambate sanna bananiko on·na uko Shillong-ona watatahachim.
Indake ong·genchimoba, ia mandeko Shillong songjinmani NEIGRIHMS-ona ra·angon uko siaha ine doctor-rang parakataha.
Shillong-oni Guwahati-ona dakanggipa ramarango pangnan manderang nangana bate ta·rakdugae garirangko salrongani a·sel ia jolrango, bang·en iandakgipa a·sel ong·anirangko nikna man·rongengachim.
