TURA: South Garo Hills a·jani Siju cave ba rong·kol sepangjolo donggipa, Adventure Park damsani nosto ong·ani bidingo mongsonggipa ja·pang-ja·dilni gimin am·sandianiko dakna gita, a·dokni Cabinet Minister aro Siju-Rongara-ni MLA Rakkam A Sangma nina re·angaha.
Ia park, 2022 bilsini gisepo mikka chi dal·ani somoio nosto ong·ahachim indiba bang·a manderangni chanchichipanio, iani ja·pangara chi dal·anichisan nosto ong·atako man·jaha indiba mangrakgipa ong·e rikjani a·selsa ong·ahachim. Iani bidingo kakketgipa ja·pangko u·ina gita MLA Rakkam A Sangma, South Garo Hills-ni Deputy Commissioner aro official-rang baksa chanchirime am·sandianiko dakanggen ine koborko ra·timgiparangna parakataha.
Una agreba, Minister-ni aganani gitade, Siju Cave aro sepangjolo taridapaniko dakna nangenggipa biaprangko namdapatna gita 2019-20 bilsirangon project-ko a·bachengatna sanction ka·manahachim, aro mitam kamrangkode matchotaba matchotahachim. Ia biapo donggipa cafeteria, watch tower, solar lighting aro zip-lining iarangko tarie matchotahachim aro iarangni bidingo ua, Tourism department-ni official-rangoniko am·sandianggen ineba ua parakaha.
Una agreba, 2022 bilsio mikka chi dal·anichi, ia programme-ni ning·o tarigimin parking lot-ba chu·gimikan nosto ong·atako man·ahachim.