SHILLONG: Meghalaya a·doko niam gri koelarangko bikote salruraenga ine matnanganirangko man·engani gimin iandake niam gri koela bikotanirangko champengna man·na gita koela bikotgipa pilak a·jarangon drone-rangchi sandirokaniko dakchina Justice (Retd) BP Katakey committee-ni 27-gipa interim report-o ku·pattianiko on·angaha.
Meghalaya High Court-na on·anggipa interim report-o Justice Katakey committee-ni parakatani gitade, koela bikotgipa mitam biaprangara ga·nanggijagipa aro garirang soke man·gijagipa biaprangsa ong·ani gimin niam gri koela bikotaniko sandirokanio neng·nikanirangko chagrongna nangengachim.
“Uni gimin Meghalaya a·dokni pilak koela bikotgipa biaprangon drone-rangchi sandirokanirangko dakna man·genchimode niam gri koela bikotani aro salruraaniko nambate champengna man·genchim,” ine interim report-o Justice Katakey committee parakataha.
Drone-rangchi sandirokanirangko dakna gita Shillong-ni Police Headquarter-o SP-rangchi train ka·ako man·gipa DSP aro gipin police official-rangko songchina gitaba Justice Katakey committee, ku·pattianiko on·angaha.
Drone-rangchi survey ka·aniko antiprakon report on·china gitaba Justice Katakey-ni interim report-o ku·pattianiko on·angaha.
East Jaintia Hills, West Jaintia Hills, South Garo Hills aro West Khasi Hills a·jarango M/s Garuda UAV Soft Solution Pvt Ltd-ni aerial survey ka·aniko matchotatenba, February 28 tarik ba una skangan bon·kamgipa report-ko on·china gitaba Justice Katakey committee, ge·etaniko on·angaha.
