WILLIAMNAGAR: NHIDCL-ni ramako apalbatate tarianio a·a nokgiparangna tangka paisarangko chu·onga gita gamja ine Rongjeng jolo donggipa a·a nokgiparang suk ong·gijaniko paraktokaha.
Ramarangko apalbatate tarianio NHIDCL-ni ra·gipa a·arangna tangka gamani bidingo talataniko on·china gitaba a·a nokgiparang dabiangaha.
Jolo songdongenggipa manderangni parakatani gitade, an·tangtangni a·arangna tangka paisarangko chu·onga gita gamjaengani giminan uamang, a·arangko on·na gita soi ka·naba jechakahachim indiba uamang maniteljagenchimode, uamangni a·arangko sorkari ra·dragnok ine jangbingbanganirangko knasona man·ahani gimin a·a nokgiparang bang·batan, nanga lekkarango soi ka·na gita Williamnagar-ni Revenue office-ona re·angtokaha.
Ia jolo galamal dokkan dake cha·enggipa saksa SN Sangma-naba uni revenue office-ona re·angon, una gong lak 8-mangni gita tangkarangko gamgen ine mesokatahachim indiba iani bidingo una maming sea jotachi ku·rachakanikoba on·jaha aro uni lekkako photo ka·e ra·na bi·oba on·jaha.
“Ia dokkanara angni pagipa saginiko man·rikgipa dokkansa ong·achim aro kamgri ong·pae iachin anga angni nokdangko aro angni nodrang-jongdrangkoba aldupaengachim. Ia dokkanko chalaianichi anga bilsio lak 12-oni lak 15-mangnade kamaipaengachim indiba ia dokkanko gimaatahaode anga nokdang chalaianio neng·nikanirangko chagrongna nanggnok. Ia dokkanni pal angna lak 8-mangkosan on·aigen ine aganataha indiba ian angni man·na nangani gita ong·jaengani gimin anga namen duk man·a,” ine dokkan nokgipa aganaha.
Iani bidingo songni manderang, re·anggipa February 10 tariko, East Garo Hills a·jani Deputy Commissioner-ko gronge agangrikna jotton ka·ahachim indiba DC, gipin kamrang dongani a·sel uamang name agangrikna man·jaha ine kobor on·aha.
An·tangtangni a·arangko gimaatna nangengoba official-rangoniko maming dakchakanirangko man·tokjaengani gimin da·o a·a nokgiparang, High Court-ona re·ange badi ka·skana miksongenga.
“Ian chingni a·arangsa ong·a aro chingni janggi tangani cholba ong·a. Sorkari chingni nangnikaniko knachakjaenga ong·ode chinga ainni gita dakgrikana agre maming chol dongjaengaha,” ine Sangma aganaha.
Indake ong·engon, ia a·arangna tangkarangko gamanio maiba ong·gija dakani dongakon ine Tura-ni social activist Cherian Momin-ba parakataha.
Momin-ni parakatani gitade, Meghalaya Right to Fair Compensation and Transparency in Land Acquisition, Rehabilitation, and Resettlement Act, 2013 (Rules 2015)-o pangchake, a·arangko ra·na skangba nangchakeako man·gipa nokdangrangni 80 percent skanikode man·chengna nangani ong·achim indiba ia obostao, a·a nokgiparangna badita tangkarangko gamgen, uarangni gimin maming sea jotachi ku·rachakaniba dongskakujaengachim.
