SHILLONG: Nangana bate bostu salgipa garirangko sorkari official-rang maming sasti gri re·na on·enga ine badi ka·anirangko man·soahani gimin a·dokni dingtang dingtang biaprango donggipa weighbridge-rangko sandirokchina Meghalaya High Court ge·etangaha.
Weighbridge-rango sorkari official-rang maming sasti on·ani gri nangana bate bostu salgipa garirangkoba re·na on·enga ine mande saksa badi ka·angani ja·man ia ge·etaniko, Chief Justice IP Mukherjee aro Justice W Diengdoh-ni kachari on·angaha.
Badiaba badiaba weighbridge-rang name kam ka·jaengani a·sel a·dok sorkarina kajina man·anio noksan ong·na nangenga ineba High Court-na badi ka·doangaha.
Ia badi ka·anirangara kakket ong·ama ong·ja uko sandirokchina High Court, sorkari official-rangna ge·etaniko on·angenba, iani bidingo inquiry commissioner-ko report on·china ge·etangaha.
Meghalaya a·doko donggipa weighbridge-rangko biming seenba, badi ka·gipa mandena re·baenggipa February 19 tarikni gisepon watatchina gitaba High Court, sorkarina ge·etaniko on·angaha.
