RESUBELPARA: Bristibar salo, Ante Natal Care (ANC)-ni Health Camp-ko North Garo Hills a·jani Resubelpara Community Health Centre (CHC)-o ong·atangaha aro ia health camp-o an·o donggipa bang·bea ma·giparangan bakko ra·e namgnirangko man·aha.
Ia health camp-ko ong·atanio, Dr Vince Chimpoo M Momin aro Dr Abida M Marak, an·o donggipa ma·giparangna OPD screening, ultrasound service aro agan-ku·pattianirangko on·angaha.
Ia health camp-ko ong·atanio, North Garo Hills a·jani Assistant Commissioner Torali K Marak, mongsonggipa sokgipa ong·e, jinmana aganprakangengon, an·o donggipa ma·giparangni an·tangtangko porikka ra·e nina nangchongmotani gimin aganangenba, an·o donggipa pilak ma·giparangkon, register ka·china aro medical department-ni on·enggipa ANC aro gipin sanna bananirangko ra·china didiangaha.
An·o donggipa ma·giparangni namgnina ia program-ko ong·atahani gimin ua dingtangmancha, North Garo Hills a·jani Medical department aro District Medical & Health Officer-koba mittelpilangaha.
Songadam nokadamrangona re·rurae, sanna bananirangko on·engani gimin ASHA-rangko mittelpilangskaengon, sanna banani kamrangko nambate ka·na man·na gita medical-ni manderang baksa bakrimchina Marak, ma·giparangkoba didiangaha.
Ia program-ko ong·atani bidingo, North Garo Hills a·jani SDM&HO Dr NR Marak, jinmana talate on·angskaengon, batanggimin chang ANC-na register ka·anio, an·o donggipa ma·giparangoni 51 percent-san namgnirangko man·aiaha ine parakataha.
Bi·sa bakgitchakrangni aro an·o donggipa ma·giparangni sianiko komiatna gita ta·raken porikkarangko ra·e sanna bananirangko ra·na man·na gita ANC-ni ning·o register ka·na nangani giminba Dr Marak aganangaha.
Ia health camp-ko ong·atanio dongpae jinmana aganprakanggipa gipin manderangara, NGH-ni DM&HO Dr PS R Sangma, DIO In-charge Dr RK Sangma ICDS-ni Lady Supervisor SG Momin aro gipinrang ong·a.
