SHILLONG: Meghalaya a·doko songdongenggipa manderangko Indian Constitution-ni Article 371-an Constitution-ni Sixth Schedule-na bate nambatgipa ine dilsretanina Voice of the People’s Party (VPP)-ko, National People’s Party (NPP) matnangataha.
VPP, Constitution-ni Sixth Schedule-ko namnikjaode ia February 21 tariko ong·atna sienggipa Autonomous District Council (ADC) Election-o susaani ortoan dongjaha ine a·dokni Cabinet Minister aro NPP-ni dilgipa, Ampareen Lyngdoh aganaha.
Salgro salaram a·dokrangoni Mizoram aro Nagaland a·dokrango Article 371 donge mamung namgniko nikja ine matnangahaoba ia Article 371, Sixth Schedule-na bate dal·bata ine ma·sieba Mizoram a·dok maina Sixth Schedule-ko bon·atna gita dabijaha ineba Lyngdoh sing·doataha.
Una agreba, VPP-ni chu·sokatna manchigimin ba Party-ni Manifesto-o Article 371-ni donggijanina Lyngdoh, VPP-ni dilgiparangko sing·doangaha.
Article 371-ni bidingo name ma·sipagijagipa manderangko iani bidingo dilsretjachina gitaba VPP-ni dilgiparangko, Lyngdoh didiangaha.
“Article 371-ni bidingo agan-chanchirimna nangnikenga ong·ode Assembly-osa chanchirimbo maina seokako man·gipa dilgiparangni chanchirimani biapde Assembly-sa ong·a,” ine ua aganaha.
VPP MLA-rangni gisepon ma·sichakgrikani dongjani gimin VPP-oniko iandakgipa kamrangna agrede maiko ka·dongna man·gen ineba NPP-ni dilgipa matnangataha.
“Iandakgipa kamrangni bidingo manderangna aganprakena skangde an·tangtangni gisepo meligrikgijanikon namatchengchina anga uamangko didienga,” ine Lyngdoh aganaha.
