SHILLONG: India a·songo man·e cha·batsranggipa mandeba, Meghalaya a·doko skatang a·arangko brena bil man·jawa ine a·dokni Deputy Chief Minister aro National People’s Party (NPP)-ni state president Prestone Tynsong parakataha.
Tynsong-ni aganani gitade, Meghalaya a·doko autonomous district council aro Meghalaya Land Transfer Act dongani gimin a·songo man·e cha·batsranggipa mandeba, skatang a·arangko brena man·ja.
“A·songo man·e cha·batsranggipa Mukesh Ambani gita dakgipa manderangba Meghalaya a·dokode skatang a·arangko brena man·ja maina an·chingni pagitchamrangan an·chingna autonomous district council-rangko aro Land Transfer Act-ko tarie on·angaha,” ine Tynsong, NPP-ni candidate aro changgittamna MDC ong·enggipa Grace Mary Kharpuri-na campaign ka·engmiting somoio aganaha.
KHADC-ni pass ka·gipa Land Act-ara namen bilakgipa ong·a aro mikkangchiba Tribal manderangni a·ani kosako man·gipa bilrangko bilakdapatna man·kugen ineba ua aganaha.
“An·chingo ADC-rang aro Land Transfer Act dongani gimin kenna nangani katta dongja,” ine Tynsong aganaha.
KHADC-o NPP-chi dilgipa Executive Committee-ni pass ka·gipa mingsni Bill-rangko Governor-ni ra·chakaniara dal·begipa chu·sokani ong·aha ineba a·dokni Deputy Chief Minister parakataha.
NPP-chi dilenggipa MDA sorkariko tangka paisa jakkalsreta ine matnanganirangko jegalatengon, “Opposition dolrangni maming pangchakani gri matnanganirangko manderang bebera·na nangja maina hisap ki·tap gride sorkari, naiasakoba skatang koros ka·na man·ja. An·chingo CAG donga aro ian tangka jakkalsretgipa manderangko pattokona watatna man·aigen,” ine Tynsong aganaha.
