TURA: Mijal Robibar pringwalo, Williamnagar-ni mongsonggipa bazar-ko wa·al kamanichi komibeoba dam 15 dokkanrangko chu·gimik wa·al kamchapaha indiba wa·al kamanio darangba janggirangko gimaatna ba saknaanirangko man·na nangjaha.
Police-rangni u·iatani gitade, ia biapo wa·al kamenga ine koborko man·soa bakan wa·al kimitgipa gari aro sipairang, ia biapona re·ange wa·alko kimitna jotton ka·aha aro bon·kamao wa·alko Robibar pringwalni 3:00 bajimango chu·gimik kimitna man·aha.
“Williamnagar bazar-o biap damgnioni wa·al kamahani a·sel a·bachengode wa·alko kimitanio neng·nikanirangko chagrongna nangaha indiba pring 3:00 bajimango wa·alko chu·gimik kimitna man·aha,” ine East Garo Hills a·jani SP SA Rynjah, kobor ra·timgiparangna parakataha.
Wa·al kamani a·selko talbate ma·sina uamang sandirokanirangko dakenga ineba SP parakataha.
Ia biapo wa·al kamaniko Robibar pringwalni 12:22 bajimango kobor man·soaha ine Fire & Emergency Service-ni SP Bruno A Sangma parakatskaaha.
“Kobor man·soa bakan wa·al kimitgipa sipairang, wa·al kamchakatgipa biap damgnikon kimitna rakbee kamko ka·aha aro uandaken pring 1:10 bajimango wa·alko kimitna man·e, pring 3:00 bajimangode chu·gimik kimitna man·aha. Wa·al kamanio janggi gimaani ba saknaa man·anirangba dongjaha aro wa·al kamanio badita noksan ong·na nangachim da·o chinga hisapkuenga,” ine Sangma aganaha.
Batanggimin somoirangoba, Williamnagar-ni dingtang dingtang biaprango wa·al kamanichi apsan daken dokkanrang kamchapako man·ahachim ine nikna man·a. Bang·bata biaprangon bijoli kamsotani a·sel aro mitamrangode manderangni simsakjani a·sel iandake wa·al kamanirangko nikna man·rongengachim.
W’nagar bazar-ko wa·al kamanio dam 15 dokkanrangko bon·pile kamchapa
Date:
Share post:
