SHILLONG: Gipin constituency-oni susana man·ja ingipa niamko saoba una mesoke on·na man·genchimode ua election-o susajawa ine Khasi Hills Autonomous District Council (KHADC)-ni Chief Executive Membor aro Nongthymmai constituency-ni National People’s Party (NPP) candidate Pyniaid Sing Syiem parakataha.
Sohryngkham constituency-ni MDC ong·e da·o ua Nongthymmai constituency-oni susaskaengani gimin sing·anina Syiem, ia kattarangko aganaha.
“Ia a·songo songdonggipa mande ong·e, anga je constituency-oniba susana man·aia. Gipin constituency-oni susana man·ja ine saoba angna niamrangko mesoke on·na man·genchimode anga an·tangni nomination-ko ra·pilna man·aigen aro election-o susajawa,” ine Nongthymmai-o ong·atanggipa common platform-o sing·anina KHADC-ni CEM aro NPP-ni candidate aganaha.
Sohryngkham constituency-ni MDC ong·eba da·o uni Nongthymmai constituency-o susaengani gimin sing·doangengon, Nongthymmai constituency-o seokako man·taigenchimoba ua apsankon daktaigenma ine ia common platform-o Syiem-ko sing·doahachim.
2021 bilsio gitcham MLA David Nongrum-ni siani gimin Mawryngkneng Assembly constituency-ni by-election-ko ong·atanio ua susae seokako man·ahachim ine gisik ra·atpilaniko on·angengon, indita bakkandikbegipa somoioba ua MLA ong·e, Mawryngkneng constituency-ni manderangna dangdike on·na jotton ka·aha aro 2023 bilsini Assembly election-o ua susataion, uko seokgipa apsan manderangan uko seokskajaha ine Syiem parakataha.
Re·baenggipa February 21 tariko ong·atenggipa MDC election-ni gimin janapatskaengon, Sohryngkham constituency-ni MDC ong·e ua manderangni neng·nikanirangko namatna aro manderangni nangnikanirangko chu·sokate on·na rakbee kamrangko ka·aha ine Syiem parakataha.
