SHILLONG: MDC election-na da·o adita salrangsan dongaiahaon, ia election-na skang National People’s Party (NPP) aro a·dok sorkari, tangka aro bil-jakrangko jakkale vote-rangko salna jotton ka·naba gnang ine Congress dol mikrakataniko on·angaha.
Iani bidingo kobor ra·timgiparang baksa agangrikengon, da·o dipet Congress dolni election-na campaign ka·anirang namenga ine Meghalaya Pradesh Congress Committee (MPCC)-ni president Vincent Pala parakataha.
“Ia district council election-o chinga name dakna nangaiachim indiba da·o election-na antisasan dongaiahani gimin sorkariko chalaienggipa dolrang, an·tangtang cholijaeming election-na skangmangmang tangka aro bil-jakrangko jakkalani cholrang donga,” ine Pala aganaha.
MDC election-o Congress dol name dakna man·gen aro komibeoba dam 17 constituency-rangko cheani cholrang donga ine janapatengon, Voice of the People’s Party (VPP)-ba Mawlai aro Nongkrem gita dakgipa constituency-rango bilakbatengaha ine MPCC-ni president ku·rachakaha.
NPP-ni bidingo janapatskaengon, NPP-de tangka aro bil-jako pangchakaigipa dolsa ong·a indiba Meghalaya a·dokni manderangara seng·giparangsa ong·a ine Pala aganaha.
Ia district council election-o Congress dol, name dakna ka·dongengani gimin election-ni ja·man gipin dolrang baksa bakrimna nangjawa ineba Pala aganaha.
“Election-ni ja·man gipin party-rang baksa bakrimna nangani katta dongja maina chinga an·tangtangan chu·sokgipa ong·aigen,” ine MPCC-ni president a·kangataha.
Khasi Hills Autonomous District Council (KHADC) aro Jaintia Hills Autonomous District Council (JHADC) election-ko re·baenggipa February 21 tariko ong·atenba, vote-rangko February 24 tariko chanenba parakatanggen.