SHILLONG: 2028 bilsina skangan Pynursla bazaar-ko Police Bazar (Khyndailad) gita tarigen ine Sombar salo, a·dokni Deputy Chief Minister aro National People’s Party (NPP)-ni state president Prestone Tynsong, ku·rachakaniko on·angaha.
Sombar salo, Nongshken constituency-ni MDC Grace Mary Kharpuri aro Langkyrdem-Laitkhroh constituency-ni NPP candidate Rahboklang Tynsong-na campaign ka·engmiting somoio a·dokni Deputy Chief Minister, ia ku·rachakaniko on·angaha.
An·tangtangni constituency-rango namroro silroroaniko ra·bana gita sorkariona re·anggija a·dok sorkarikosa matnange roaiengani giminba ua mitam MLA-rangko matnangataha.
“Ia constituency-nasan ong·aigija a·dok gimikon namroro silroroaniko ra·bana chinga rakbee kamrangko ka·enga. Chinga PWD office-ko gipin biapona apjitangskaenba, ia biapo parking lot-ko tarina miksongenga aro ia biapko damgipin Police Bazar ong·atgen. Ian Ri War-ni manderang bang·en namgniko ra·bagen. 2028 bilsina skangan chinga ia biapko dingtangatgen ine da·alo anga na·simangna ku·rachakaniko on·enga aro iako chinga Dorbar Shnong baksa nangrime chu·sokatgen,” ine Tynsong aganaha.
Opposition dolrangni uko aro a·dok sorkariko social media-rango matnangengani gimin jegalatengon, ia dolrang, sorkarini kosako tol·e matnangna jotton ka·engoba Pynursla-ni manderang, uamangko bebera·jawa ine Tynsong aganaha.
Autonomous District Council (ADC)-rangode inditana scheme-rang bang·a ong·ja ine janapatskaengon, MDC-rang, sorkari baksa bakrime kamko ka·genchimode bang·en scheme-rang ia constituency-ona sokbaaigen ine NPP-ni state president, ku·rachakaniko on·angaha.