SHILLONG: University of Science & Technology Meghalaya (USTM)-o poraienggipa chatro chatrirangna tol·gipa certificate aro degree-rangkosa on·enga ine Assam a·dokni Chief Minister Himanta Biswa Sarma-ni matnangani ja·man, iani bidingo maming ja·kurangko de·na skangba sakkirangko man·chengna nanggen ine Meghalaya a·dokni Education Minister Rakkam A Sangma aganskaaha.
“Kakketko ma·sichenggijade iani bidingo anga mamingkoba aganna man·jawa. Jeba matnanganirangkode dakna man·aia indiba sakkirang dongna nanga. Ian kakket ong·engnaba gnang ba ong·jaengnaba gnang indiba sakki gride iani bidingo am·sandianirangko dakna man·jawa,” ine Sangma aganaha.
USTM-ni kosako matnanganiara kakket ong·bebegenchimode sorkari nanga gita ja·kurangko de·angaigen ineba Education Minister ku·rachakaniko on·angaha.
“Ian namen ong·na kragija matnangani ong·enga indiba ian kakket ong·bebegenchimode sorkari, ja·kurangko de·telaigen,” ine ua aganaha.
Re·anggipa Robibar salosan Assam-ni Chief Minister Himanta Biswa Sarma, USTM-o tol·gipa degree-rangko on·enga aro tangka paisarangko jakkalsretenga ine matnangatahachim. Iandake matnanganirang ong·katani ja·man manderangni gisepo jajrengna nanganirangko ong·atskaahachim.
“Ian namen gisiko nangatbegipa matnangani ong·enga indiba ia matnanganiko sakkirang baksa u·iatna man·genchimode iani bidingo name am·sandianirangko dakchongmotgen. Da·o dipet iani bidingo mamingkoba aganna man·kujawa indiba ja·mano nangani kri sorkari, ja·kurangko de·angaigen,” ine Sangma parakataha.
USTM aro University-ni Chancellor Mahbubul Hoque-koba Assam-ni Chief Minister, tol·gipa certificate-rangko on·e ‘cha·bokenga’ ine matnangatahachim. Hoque-ni caste certificate-koba ua tol·e tarigipa certificate-sa ine matnangahachim.
Assam CM-ni USTM-ko matnanganiara ian skanggipa chang ong·ja maina batanggimin somoirangoba ua USTM-ko Guwahati songjinmao chi ditdoatgipa ine matnangahachim.
Assam a·doko USTM-ni degree-rang choliama cholijawa uko da·o Assam sorkari nipilengkua ineba Sarma aganaha.