SHILLONG: Meghalaya a·doko bobil dake chakatenggipa Hynniewrep National Liberation Council (HNLC) dolko niamni kosako chakatgipa ine mesokna a·dok sorkari, Union Home Ministry-ni bikotgipa Unlawful Activities (Prevention) Tribunal-na nanga lekkarangko on·manaha.
Ia Tribunal-ara, HNLC bobil dolko champengani bidingo raiko on·na gita ma·mong sorkarini songgipa bimang ong·a aro ia Tribunal, HNLC bobil dolni kosako champenganiko nipilengkua.
Ia Tribunal-ni tom·aniko, re·anggipa Sonibar salo ong·atangaha aro da·o changgipin tom·aniko, mikkang jao ong·attaina miksongenga.
Sonibar salo ia Tribunal-ni tom·aniko ong·atanio, 2019 bilsini November 16 tarikoni 2024 bilsini June 30 tarikona HNLC bobil dolni ong·gijagipa dakgipa ming 48 case-rangni bidingo chanchirimangaha.
Ia somoirangni gisepo, HNLC bobil dolni ong·gija dakgipa kamrang baksana sakgittam manderangni bame on·ani aro sak 73 manderangko rim·ani bidingo see rakkianikoba nipilangaha.
Ia Tribunal-ko Gauhati High Court-ni Justice Soumitra Saikai dilenga aro ia Tribunal-ni daitoara, HNLC bobil dolko niamni kosako chakatgipa dol ine channa chu·onga gita sakkirang ba case-rang dongama dongja uko nipilanian ong·enga.
HNLC bobil dolko re·anggipa bilsini November 14 tarikosan ma·mong sorkari, bilsi 5-na champengatako man·gipa dol ine parakatenba, HNLC bobil dolni ong·gija dakgipa kamrangko mesoke on·angahachim.