TURA: West Garo Hills a·jani Rongram Block ning·o donggipa Asananggre primary health centre (PHC)-o kam ka·giparang chu·ongjaengani a·sel manderangna dangdike on·anio neng·nikanirangko chagrongna nangenga.
Ia PHC-o Birth aro Death Certificate ba atchiani aro siani certificate-rangko tarienggipa manderang, certificate-rangko man·na gita bilsisarang nangenga ine u·iatani ja·man, ia PHC-o kam ka·enggipa manderangni chu·onggijaniko ma·sina man·aha.
Kobor on·timgiparangni u·iatani gitade, ia Asananggre PHC-o office-ni kamko ka·enggipa manderang sakgnisan aro ia PHC-ni ning·o songdongenggipa manderang jelbra jelsubatahani gimin kamrangko ka·anio neng·nikanirangko chagrongna nangenga.
Ia PHC-o kam ka·giparangko rakkidapchina baditaba chang official-rangna u·iatahachim indiba da·alonan maming ja·kurangko de·kujaenga ineba kobor on·timgiparang parakataha.
Ia office-o kam ka·enggipa mitam manderang, somoi gita office-ona sokbajaengani a·selba somoi gita kamrangko ka·srapjaenga ineba songni nokni manderang, suk ong·gijaniko parakattokaha.
“Mitam songni manderangde chel·a biaprangonisa re·baengani gimin seng·gnang re·pilna nanga indiba kam ka·giparangan somoi gita sokbajaengani a·sel basakobarangde office-ni kamrangko matchotsrapangjaenga,” ine Asananggre PHC-ona degipani Birth Certificate-ko tarina re·bagipa mande saksa aganaha.
