SHILLONG: Knal February-ni 21 tariko ong·atenggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-na campaign ka·ani Budbar attamni 4:00 bajio matchotangahaon, ia bon·kamgipa somoio Voice of the People’s Party (VPP)-ni dilgiparang, Bara Bazar ba Iewduh-ona re·angenba, bading chiwale aro dokkan dake cha·enggipa manderangko grongenba, VPP-ni candidate-rangko seokchina didiangaha.
Meghalaya a·doko election-rangko ong·atanio ian skanggipa changna political dolni Iewduh-ona re·angenba, campaign ka·aniba ong·aha.
Ia Bara Bazar ba Iewduh-o bading chiwale aro dokkanrangko dake cha·enggipa bang·bata manderang songadam nokdamrangonisa ong·ani gimin ia campaign ka·ani bon·kamgipa somoio VPP-ni ia manderangko grongeaniara MDC election-o VPP-na namgniko ra·baani cholrang dongskaaha.
