USTM-ni degree-ko UGC recognize ka·a: CS
SHILLONG: University of Science & Technology Meghalaya (USTM)-o tol·gipa degree-rangkosa on·enga ine Assam a·dokni Chief Minister Himanta Biswa Sarma-ni matnanganiko Budbar salo, Meghalaya a·dokni Chief Secretary DP Wahlang jegalatenba, USTM-o on·enggipa degree-rangko University Grants Commission (UGC)-ba recognize ka·a ine talataniko on·angaha.
USTM-o poraienggipa chatro chatrirangna tol·gipa certificate aro degree-rangkosa on·enga ine adita salrangna skangsan, Assam a·dokni Chief Minister Himanta Biswa Sarma-ni matnangatahachim ine nikna man·a.
USTM aro University-ni Chancellor Mahbubul Hoque-koba Assam-ni Chief Minister, tol·gipa certificate-rangko on·e ‘cha·bokenga’ ine matnangatahachim. Hoque-ni caste certificate-koba ua tol·e tarigipa certificate-sa ine matnangahachim.
USTM-o tol·gipa degree-rangkosa on·enga ine matnanganiko jegalatskaengon, USTM-o on·enggipa degree-rangara niam gita on·enggipa degree-rangan ong·a aro ia degree-rangko UGC-ba recognize ka·a ine a·dokni Chief Secretary talataniko on·angaha.
“USTM-ara state university ong·a aro iako chalaina Meghalaya a·dokni State Legislative Assembly-an bilko on·aha. Ia university-o on·enggipa degree-rangko UGC-ba recognize ka·ani gimin ia degree-rangara tol·gipa degree ong·ani katta dongja. Ian asol university ong·a aro ia university-na Meghalaya sorkari dakchakanirangko on·enga,” ine Wahlang aganaha.
USTM-o on·enggipa degree-rangko tol·gipa ine matnangani gimin adita salrangna skangsan a·dokni Education Minister Rakkam A Sangma-ba iandake matnanganirangko dakna skang sakkirangko mesokchina aganahachim.
USTM-ni kosako matnanganiara kakket ong·bebegenchimode sorkari nanga gita ja·kurangko de·angaigen ineba Education Minister ku·rachakaniko on·angaha.
USTM-o poraienggipa chatro chatrirangna tol·gipa certificate aro degree-rangko on·e manderangko cha·bokenga ine Assam a·dokni Chief Minister Himanta Biswa Sarma matnangatani ja·man, iani bidingo kakketko ma·sina man·na gita judicial inquiry-ko dakchina Meghalaya a·dokni Bharatiya Janata Party (BJP) dabiangskaahachim.
