SHILLONG: Meghalaya a·doko bobil dake chakatanina champengatako man·gipa Hynniewtrep National Liberation Council (HNLC) dol, internet-rang gita chadamberangko rimnapna jotton ka·enga ine kobor on·aha.
Bangladesh a·songo Sheikh Hasina sorkari be·gruani ja·man bobil dake chakatgipa dolrangni bilakbee kam ka·anirangko nikna a·bachengaha aro uandaken da·o India a·songni salgro salaram jolrangoba bobil dake chakatgipa dolrangko bilakatpiltaina kam ka·anirangko knasona man·engachim.
Kobor on·timgiparangni u·iatani gitade, iandakgipa obostarang ong·engon, HNLC bobil dolba, internet-rang gita gital membor-rangko rimnapna jotton ka·skaenga aro adita sak manderangba HNLC bobil dolo napahachim indiba ja·mano an·tangtangko bame on·pilskaaha.
HNLC bobil dolo da·o dilgiparangko man·chape gimik sak 20-mangsan dongaiaha ineba kobor on·timgiparang parakataha.
“Skango gita ong·gija da·o HNLC bobil dol, internet-rang gitasa membor-rangko rimnapna kam ka·skaengaha maina internet gita chadamberangko altuaen salna man·enga. Da·o dipet HNLC bobil dolni gital membor-rangko rimdapna kam ka·ani chu·sokgipa ong·srangkujaengoba adita sakrangde bobil dolo napenba, an·tangtangko bame on·pilaha,” ine kobor on·timgipa official-rang aganaha.
Intelligence report-o parakani gitade, HNLC dolsan ong·aigija ULFA-I aro NSCN gita dakgipa bobil dolrangba da·o Bangladesh a·songo ong·enggipa obostarangko chol ra·e, doltangtangko bilakatpiltaina jotton ka·enga.
Salgro salaram jolrango iandake bobil dolrang ong·kattaina jotton ka·enga ine koborrangko man·soani ja·man bobil dolrangni ong·kattaianiko champengna gita sorkarirang aro sipai dolrangkoba mikrakbee kamrangko ka·soskaengaha ine kobor on·timgiparang parakataha.
Garo Hills-o bobil dake chakatgipa Garo National Liberation Army (GNLA) dolko bikottaina jotton ka·enga ine jangbingbanganiko adita salrangna skangsan a·dokni Cabinet Minister aro Williamnagar-ni MLA Marcuise N Marak jegalatahachim.
