TURA: University of Science & Technology Meghalaya (USTM)-ni PA Sangma International Medical College & Hospital (PIMC), National Medical Commission (NCM)-ni dongimin niamrangko ja·rikjaenga ine Tura-ni MDC aro BJP-ni state vice president Bernard N Marak matnangataha.
Marak-ni parakatani gitade, medical college campus-o komibeoba ge 300 palang donggipa hospital dongna nanga ine NCM niamko donahachim indiba ia USTM-ni PIMC-o hospital dongjani gimin ian NCM-ni dongimin niamko pe·ani gita ong·engachim.
“Medical college-rangko kulianio NMC-ni dongimin niamrangko ja·rikna gita nangchakegipa official-rang aro a·dok sorkarian nirokna nanga. Medical college-ko chalaianio komibeoba ge 300 palangrang donggipa hospital-kode chalaina nangchongmota ine anga poraimanaha. NCM-ni dongimin niamrangkon ja·rikjaenga ong·ode lakni lak koros ong·e ia medical college-o poraienggipa chatro chatrirang, jemangan sagiparangko sanna banna aro janggirangko jokatna miksonge poraiengachim, uamangni poraiani aro mikkangchi kam ka·gnide indin ong·gramaigen,” ine Marak parakataha.
National Medical Commission-ni gital niamo, ‘Skill Laboratory’-koba medical college-rangko chalaianio nangchongmota ine janapatengon, USTM-ni PIMC-o Skill Laboratory-ba dongja aro ian poraienggipa chatro chatrirangni gimaanisan ong·aigija NCM-ni niamko pe·ani ong·enga ine Tura MDC parakataha.
“Uni gimin maikai ia medical college-ko ge 300 palangrang donggipa hospital aro Skill laboratory gri chalaina man·enga, iako a·dok sorkari aro management talate on·na nanga,” ine Marak dabiangaha.