RESUBELPARA: North Garo Hills a·jani Wageasi songo niam gri ro·ong quarry-ko chalaienga ine social activist saksa Nilbath Marak, North Garo Hills a·jani Deputy Commissioner-na badi ka·doangaha.
Marak-ni parakatani gitade, ia ro·ong jetani karkanako batanggimin bilsi bonga batpile chalaienga aro ia karkanako niam gri chalaienga ine matnanganirangko man·engoba darangba iani bidingo badi ka·giparang dongkujaengachim.
Ia quarry-ni bidingo sandirokenba nanga gita ja·kurangko de·china Deputy Commissioner-ko didiatengon, ia quarry-ko Rongjeng MLA Jim M Sangma-ni jonggipaan, maming scientific mining plan grisa chalaienga ine Marak matnangataha.
“Ia quarry-oniko ro·ongrangko dumper truck-rango gate, Assam-ona ra·angako anga mikrontangchin nikaha. Ian niam gri chalaienggipa quarry-san ong·aija indiba ia quarry-ni ro·ongrangko dongimin niamna baten truck garirangko salna on·enga. Ia quarry-oniko labour-rang, ramasamonikosa truck garirango gatatengani a·sel, rama gita gari gorarangni re·ruraanioba neng·nikanirangko chagrongna nangenga,” ine Marak, North Garo Hills a·jani Deputy Commissioner-na badi ka·e sedoatgipa chittio parakataha.
Ia jolo maming scientific mining plan gri ro·ongrangko bikotengani gimin ian samtangtangna nangchakeaniko ra·bana man·a ineba ua parakataha.
