TURA: Chatro chatrirang, 2023-24 bilsini scholarship-ko man·tokkujaengani a·sel neng·nikanirangko chagrongna nangtokengani gimin scholarship-rangko ta·raken watatchina Garo Students Union (GSU), a·dokni Chief Minister Conrad K Sangma-ko seachi didiataha.
GSU-CEC-ni president Zikku Balgra N Marak-ni u·iatani gitade, Garo Hills-o dingtang dingtang college aro skulrangoni sak 1,021 chatro chatrirang, an·tangtangni man·na nangkuenggipa scholarship-rangko man·tokkujaenga aro ia chatro chatrirangara, Tura Government College-oni sak 162, Tura Christian College-ni sak 40, Mendipathar Govt College-ni sak 109, Baghmara Govt College-ni sak 45, Tura Don Bosco College-ni sak 512, Williamnagar Govt College-ni sak 134, Babelapara Higher Secondary School-ni sak 19 aro Tura Law College-ni sak 45 chatro chatrirang ong·a.
Chatro chatrirangni man·na nangkuenggipa scholarship-rangko ta·raken watatchina Chief Minister-ko didiatengon, “Ia scholarship-rangko man·tokkujaengani a·selan chatro chatrirang aro uamangni nokdangrang, neng·nikanirangko chagrongna nangtokenga maina Garo Hills-o bang·bata nokdangrangan cholgrigiparangsa ong·pae, college aro skulni dingtang dingtang nanganirangna scholarship-rangon pangchaktokpaengachim,” ine Marak parakataha.
Scholarship-rangko somoi gita man·tokjaengani a·selan mitam chatro chatrirangde poraianirangko dontongna nangaha ine janapatskaengon, chatro chatrirang pilakan lekka poraniko man·pana gita iani bidingo ta·raken ja·kuko de·china aro bangki dongenggipa scholarship-rangko chatro chatrirangni account-rango chipatchina GSU, Chief Minister-ko didiataha.
